सोलापूर - पाटस (ता. दौंड, जि. पुणे) येथील भीमा सहकारी साखर कारखान्याच्या गळीत हंगामा शुभारंभ कार्यक्रमात मुख्यमंत्री देवेंद्र फडणवीस यांनी नाभिक समाजाबद्दल अपशब्द वापरल्याचा आरोप करत सोलापुरातील संत सेना नाभिक दुकानदार संघाच्यावतीने मुख्यमंत्री फडणवीस यांचा जाहीर निषेध केला. या निषेधाचे पत्र संघटनेच्या पदाधिकारी व कार्यकर्त्यांनी आज (शनिवार) जिल्हाधिकाऱ्यांना दिले. 

यापूर्वी सत्तेवर असलेल्या कॉंग्रेस व राष्ट्रवादी कॉंग्रेसच्या सरकारची कार्यपद्धती सांगण्यासाठी नाभिक समाजातील व्यावसायिक हे जसे गिऱ्हाईक टिकविण्यासाठी प्रत्येकाचे अर्धी दाढी, अर्धी मिशी कट असे अर्धे अर्धे काम करतात तसे मागील सरकारने कार्य केल्याचे उदाहरण मुख्यमंत्री फडणवीस यांनी या कार्यक्रमात दिले होते. या वाक्‍याचा नाभिक समाजाने तीव्र निषेध केला असून नाभिक आपण सांगत आहे तसेच कार्य करत असेल तर ते नाभिक समाजाला सिद्ध करून दाखविण्याचे आव्हानही संघटनेच्यावतीने देण्यात आले आहे. 

यावेळी संतोष धोत्रे, ऍड. विकास तिऱ्हेकर, गोवर्धन कोडपाक, शरणू हडपद, श्रीनिवास रासकोंडा, सुधीर वड्डेपल्ली, कृष्णा सिंगलराज, मोहन जमदाडे, राकेश सिंदगीकर, नरहरी रायचुरकर, श्रीकांत राऊत, मनीष गंजाळकर यांच्यासह नाभिक समाजातील पदाधिकारी व कार्यकर्ते उपस्थित होते