करकंब (सोलापूर) : करकंब (ता. पंढरपूर) येथील बदललेल्या प्रभागरचनेला विक्रमी हरकती आल्याने तहसीलदार वैशाली वाघमारे यांनी तब्बल साठहून अधिक अधिकाऱ्यांची नियुक्ती करत फेर सर्वेक्षणाचे आदेश दिले. एवढेच नाही, तर त्यांच्यासह गटविकास अधिकारी, मंडल अधिकारी, विस्तार अधिकारी, तलाठी, ग्रामसेवक, आदी 60हून अधिक अधिकारी आज (सोमवार) करकंबमध्ये घरोघर जाऊन फेरसर्वेक्षण करत होते. 
करकंब ग्रामपंचायतीची मुदत ऑक्‍टोबर 2020 मध्ये संपत आहे. त्यामुळे येणाऱ्या निवडणुकीसाठी लोकसंख्येनुसार फेर प्रभागरचना केली जाणार आहे. त्यानुसार ग्रामसेवक व तलाठी यांनी प्रभागरचना करून विशेष ग्रामसभेत मांडली होती. त्यावेळी ही प्रभागरचना बेकायदेशीर असल्याचे सांगत अनेक ग्रामस्थांनी आक्षेप नोंदवले होते. त्यावर तहसील कार्यालयाकडे रीतसर लेखी आक्षेप नोंदविण्यासाठी सात ते चौदा फेब्रुवारी हा कालावधी देण्यात आला होता. यावेळी करकंब ग्रामपंचायतीच्या फेर प्रभागरचनेवर विक्रमी 27 लेखी तक्रारी नोंदविण्यात आल्या होत्या. त्यावर प्रांताधिकारी सचिन ढोले यांच्यासमोर सुनावणीही झाली. त्यानंतर स्थळपाहणी व चर्चा करण्यासाठी तहसीलदार वैशाली वाघमारे यांनी शुक्रवारी (ता. 28) करकंबमध्ये विशेष सभा बोलावली होती. त्यामध्येही सर्वमान्य असा तोडगा निघालाच नाही. शेवटी तहसीलदार वाघमारे यांनी फेरसर्व्हेक्षण करण्याचा निर्णय घेत एकाच दिवशी साठहून अधिक अधिकाऱ्यांच्या नेमणुका करत प्रत्यक्ष सर्वेक्षणास सुरवात केली आहे. आज प्रत्येक अधिकाऱ्याला 50 कुटुंबांचे होम टू होम सर्वेक्षण करण्याचे आदेश दिले आहेत. याबाबत तहसीलदार, मंडल अधिकारी यांना संपर्क करण्याचा प्रयत्न केला असता संपर्क होऊ शकला नाही.