सोलापूर ः सोलापूर जिल्ह्याच्या ग्रामीण भागामध्ये कोरोनाबाधितांची संख्या पहिल्यांदाच शंभरीच्या खाली आली आहे. आज एकूण 93 नवे कोरोनाबाधित रुग्ण आढळून आले आहेत. आज आलेल्या अहवालानुसार एक हजार 613 जणांची तपासणी करण्यात आली. त्यापैकी एक हजार 520 जणांचे अहवाल निगेटिव्ह तर 93 जणांचे अहवाल पॉझिटिव्ह आले आहेत. आज कोरोनाने नऊ जणांचा मृत्यू झाला आहे. त्यामध्ये सात पुरुष तर दोन महिलांचा समावेश आहे. 

जिल्ह्याच्या ग्रामीण भागामध्ये आतापर्यंत कोरोनाबाधितांची संख्या 29 हजार 127 एवढी झाली आहे तर 842 जणांना आपला प्राण गमवावा लागला आहे. कोरोनाग्रस्त झाल्याने तीन हजार 322 जण अद्यापही वेगवेगळ्या रुग्णालयांमध्ये उपचार घेत आहेत. कोरोनामुक्त झाल्यामुळे 24 हजार 963 जणांना घरी सोडले आहे. आज नाईकवाडे प्लॉट बार्शी येथील 65 वर्षाचे पुरुष, तपकिरी शेटफळ (ता. पंढरपूर) येथील 60 वर्षाचे पुरुष, जाधववाडी (ता. माढा) येथील 70 वर्षाचे पुरुष, शेटे पेट्रोल पंपाजवळ पंढरपूर येथील 35 वर्षाची महिला, शेळगाव आर (ता. बार्शी) येथील 65 वर्षाचे पुरुष, वाडीकुरोली (ता. पंढरपूर) येथील 75 वर्षाचे पुरुष, नान्नज (ता. उत्तर सोलापूर) येथील 71 वर्षाचे पुरुष, खवासपूर (ता. सांगोला) येथील 24 वर्षाची महिला, माचणूर (ता. मंगळवेढा) येथील 80 वर्षाचे पुरुष यांचा आज कोरोनामुळे मृत्यू झाला आहे.