सोलापूर : शहर पोलिस आयुक्‍तालयातर्फे (Solapur City Police Commissionerate) 67 पोलिस शिपाई पदासाठी भरती (Recruitment) प्रक्रिया सुरू आहे. या भरतीसाठी आठ हजार 800 उमेदवारांनी अर्ज केले आहेत. त्या उमेदवारांची शुक्रवारी शारीरिक (मैदानी) चाचणी सुरू झाली. त्यावेळी शेवते (ता. पंढरपूर) (Pandharpur) येथील प्रभुराम प्रकाश गुरव (वय 31) या तरुणाची बनावटगिरी उघड झाली. त्याच्याविरुद्ध जेलरोड पोलिसांत गुन्हा (Crime) दाखल झाला आहे. त्याने उंची वाढावी म्हणून केसांचा बनावट विग लावला होता. त्याला आज शनिवारी न्यायालयात हजर केले जाणार आहे.

पोलिस भरतीसाठी उमेदवाराची उंची किमान 165 सेंमी असावी, असा निकष आहे. शहर पोलिस आयुक्‍तालयातर्फे आयोजित पोलिस भरतीची प्रक्रिया सुरू झाली आहे. शुक्रवारी (ता. 29) उमेदवारांची उंची, छाती मोजण्याचा टप्पा पार पडला. त्याची जबाबदारी फौजदार चावडी पोलिस ठाण्याचे वरिष्ठ पोलिस निरीक्षक राजेंद्र बहिरठ यांच्याकडे होती. उंची मोजत असताना प्रभुराम गुरव याची उंची मोजली जात होती. त्याचे आजूबाजूचे केस कमी आणि मध्यभागीच उंच केस असल्याचे दिसून आले. वरिष्ठ पोलिस निरीक्षक बहिरठ यांना संशय आल्याने त्यांनी त्याच्या केसात हात घातला. त्यावेळी त्याने घातलेला केसाचा विग उपसून निघाला. तत्पूर्वी, प्रभुराम गुरव या उमेदवाराची मूळ उंची 163.7 सेंमी होती. त्यामुळे त्याने ही तोतयागिरी केल्याची बाब उघड झाली. या प्रकरणाचा पुढील तपास पोलिस उपनिरीक्षक हणमंत बादोले हे करीत आहेत.

टोप घालूनही उंची कमीच निघाली

शेवते (ता. पंढरपूर) येथील प्रभुराम गुरव याची मूळ उंची 163.7 सेंमी इतकी आहे. पोलिस भरतीसाठी 165 सेंमी हा उंचीचा निकष पूर्ण करण्यासाठी त्याने केसाचा बनावट विग घातला होता. त्याची ही तोतयागिरी उघड झाली. दरम्यान, त्या उमेदवाराची केसाच्या बनावट विगसह उंची मोजली, त्यावेळी त्याची उंची 164.5 सेंमीपर्यंतच निघाली. विग घालूनही तो उंचीचा निकष पूर्ण करू शकला नाही. शासनाची फसवणूक करून सरकारी नोकरी मिळविण्याचा प्रयत्न केल्याप्रकरणी प्रभुराम गुरव हा जेरबंद झाला. पोलिस भरतीवेळी असे अनेक प्रकार यापूर्वीही उघड झाल्याने संबंधित वरिष्ठ अधिकारी उमेदवारांची कसून तपासणी करतात. त्यातून हा प्रकार उघड झाला आहे.