तात्या लांडगे

सोलापूर : सोलापूर शहरातील एका नामांकित शाळेत नोकरी लावतो, म्हणून दोघांनी एका तरुणास साडेसात लाख रुपयाला गंडा घातला आहे. सेवानिवृत्त शिक्षकाने मुलाला शिक्षक म्हणून नोकरी लागतेय म्हटल्यावर निवृत्तीची रक्कम दिली. त्या दोघांनी ना नोकरी लावली ना पैसे परत दिले. त्यांच्यावर आता विजापूर नाका पोलिसांत गुन्हा दाखल झाला आहे.

अक्कलकोट रोडवरील वज्रेश्वरी नगरातील दोघांनी फसवणूक केली आहे. विजयपूर रोडवरील सिंधु नगरातील निवृत्त शिक्षक संगप्पा जकप्पा नंदुरकर यांच्या मुलाचे डीएड झाले आहे. त्याला पूर्व भागातील चांगल्या शिक्षण संस्थेत शिक्षकाची नोकरी लावतो असे दोघांनी आमिष दाखविले होते. शाळेचे नाव ऐकून संगप्पा नंदुरकर यांनी त्या दोघांवर विश्वास ठेवला. गुन्ह्यातील संशयित आरोपी शिवानंद काशिनाथ निंबाळकर याने नोकरीसाठी १० लाख रुपये ठरविले होते. त्यांच्यावर विश्वास ठेवून फिर्यादीच्या पत्नीने शंकुतला काशिनाथ निंबाळकर यांच्या नावे दोन लाख ५१ हजारांचा धनादेश दिला.

संशयित आरोपींनी तो धनादेश वटवून पैसे काढून घेतले. दोन महिन्यांनी शिवानंद निंबाळकर याने आणखी पाच लाख रुपये मागितले. त्यावेळी मुलाला नोकरी लागेल या आशेने फिर्यादी संगप्पा यांनी निवृत्तीची रक्कम काढून संशयितास त्याच्या घरी नेऊन दिली. पण, अनेक महिने होऊनही नोकरी मिळाली नव्हती. त्यामुळे काही महिन्यांनी संगप्पा यांनी दिलेली रक्कम परत मागायला सुरुवात केली. पण, त्यांनी रक्कम परत न दिल्याने संगप्पा नंदुरकर यांनी विजापूर नाका पोलिसांत धाव घेतली.

खात्यात पैसे नसताना दिले धनादेश

मुलगा अविनाश नंदुरकर याला नोकरी लावतो म्हणून दोघांनी पैसे घेतले. पण, त्यांनी नोकरी लावली नाही. फिर्यादीने दोघांकडे पैशांची मागणी केली. त्यानंतर त्यांनी दोन धनादेश दिले. मात्र, संशयितांच्या बॅंक खात्यात तेवढी रक्कम नसल्याने दोन्ही धनादेश बाऊन्स झाले. शेवटी, फिर्यादीने पोलिसांत धाव घेतली. गुन्ह्याचा तपास पोलिस उपनिरीक्षक मोहन पवार करीत आहेत.