सोलापूर : सहा वर्षांच्या बालिकेवर लैंगिक अत्याचार केल्याप्रकरणी विठ्ठल हरी नलावडे (रा. आष्टी, ता. मोहोळ) यास जिल्हा व सत्र न्यायाधीश यु. एल. जोशी यांनी 14 वर्षांची सक्‍तमजुरी व दहा हजार दंडाची शिक्षा ठोठावली. पिडीत बालिकेच्या पुनर्वसनासाठी एक लाखांची नुकसान भरपाई देण्याचेही त्यांनी आदेश दिले.

याबाबत सविस्तर माहिती अशी की, शाळकरी मुलगी शाळेच्या गेटजवळ खेळत होती. 18 जानेवारी 2017 रोजी दुपारी दीडच्या सुमारास आरोपीने त्या चिमुकलीला पैशाचे आमिष देऊन निर्जनस्थळी नेले. तिच्यावर जबरी लैंगिक अत्याचार केले. पिडीत मुलीच्या रडण्याचा आवाज आल्यानंतर तिच्या आईचे तिकडे लक्ष गेले. त्यावेळी परिसरातील लोकही त्याठिकाणी धावले. त्यावेळी आरोपी हा त्या चिमुकलीला तिथेच सोडून पसार झाला. पिडीत बालिकेला सर्वांनी धीर देऊन विचारले, त्यावेळी पैशाचे अमिष देऊन अत्याचार केल्याचे चिमुकलीने सांगितले. पिडीतेच्या आईने आरोपी विठ्ठल नलावडेविरुध्द मोहोळ पोलिसांत फिर्याद दिली. आरोपीविरुध्द अनुसूचित जाती व जमाती प्रतिबंधित कायद्याअंतर्गत व पोस्को कायद्याअंतर्गत गुन्हा दाखल झाला. तत्कालीन उपविभागीय पोलिस अधिकारी अभय डोंगरे यांनी आरोपीविरुध्द न्यायालयात दोषारोपपत्र दाखल केले होते. या प्रकरणात सरकारतर्फे जिल्हा सरकारी वकील प्रदिपसिंग राजपूत, सहायक सरकारी वकील गंगाधर रामपुरे, ऍड. शैलजा क्‍यातम यांनी काम पाहिले. तर आरोपीतर्फे ऍड. व्ही. डी. फताटे यांनी काम पाहिले. कोर्ट पैरवी म्हणून पोलिस हवालदार सोलनकर यांची मदत झाली.

ठळक बाबी...

- लैंगिक अत्याचार प्रकरणात एकूण 12 साक्षीदारांची झाली तपासणी

- बालिकेची साक्ष नोंदविण्यासाठी लागले दहा दिवस

- पिडीत चिमुकलीला बोलके करण्यासाठी न्यायालयाकडून बडबड गीते, चित्रकला, खेळण्याचा झाला वापर

- पिडीत मुलगी, तिची आई, वैद्यकीय अधिकाऱ्यांची साक्ष महत्त्वाची ठरली

- घटनास्थळावरून जप्त केल्या बालिकेच्या बांगड्याचे तुकडे; आरोपीच्या कपड्यावरही होती माती