नातेपुते (सोलापूर) : संपूर्ण महाराष्ट्राचे लक्ष लागलेल्या अकलूज ग्रामपंचायतीच्या निवडणुकीतील प्रभाग तीनमधील मोहिते- पाटील विरुद्ध माने- पाटील लढतीत माजी उपमुख्यमंत्री विजयसिंह मोहिते- पाटील यांचे पुतणे व ज्येष्ठ नेते जयसिंह ऊर्फ बाळदादा यांचे चिरंजीव संग्रामसिंह मोहिते- पाटील यांचा पराभव झाला असून, मोहिते पाटलांना हा मोठा झटका बसला आहे. 

अकलूज ग्रामपंचायतीसाठी मोहिते - पाटील घराण्यातच दुरंगी लढत झाली आहे. 17 सदस्य संख्या असलेल्या या ग्रामपंचायतीमध्ये प्रतापसिंह मोहिते - पाटील विकास पॅनेलच्या उर्वशीराजे धवलसिंह मोहिते - पाटील या बिनविरोध झाल्याने 16 जागांसाठी सहकार महर्षी शंकरराव मोहिते - पाटील व विजयसिंह मोहिते - पाटील विकास पॅनेलचे 16, प्रतापसिंह मोहिते - पाटील विकास पॅनलचे 16 आणि अपक्ष 15 उमेदवार निवडणूक रिंगणात होते. दोन्ही पॅनेलने निवडणूक प्रतिष्ठेची करत प्रचार केला. मोहिते - पाटील यांनी विरोधी पक्षाचे डिपॉझिट जप्त करण्यासाठी मतदारांना आवाहन केले होते आणि डॉ. धवलसिंह मोहिते - पाटील यांनी अकलूजची सत्ता आमच्या ताब्यात द्या, विकास काय असतो ते दाखवून देऊ, असे आवाहन केले होते. 

माजी सरपंच संग्रामसिंह जयसिंह मोहिते - पाटील यांचा पराभव झाल्याने मोहिते - पाटील कुटुंबीयांना मोठा धक्का बसला आहे. 17 पैकी 14 जागी विजयसिंह मोहिते- पाटील समर्थक विजयी झाले असून, डॉ. धवलसिंह मोहिते- पाटील यांच्या तीन समर्थकांनी ग्रामपंचायतीत प्रवेश केला आहे. 

या पराभवाला फक्त आणि फक्त संग्रामसिंह यांचा जनसंपर्क चांगला नाही. त्यामुळे त्यांना पराभवाला सामोरे जावे लागले. 

संपादन : श्रीनिवास दुध्याल