पांगरी (सोलापूर) : पत्नी व मुलीची छेड काढत असल्याने चिडून जाऊन बाप-लेकासह तिघांनी सालगड्याचा केबल वायरने गळा आवळून खून करून विहिरीतील पाण्यात टाकून पुरावा नष्ट करण्याची घटना उघडकीस आली. ही घटना पांगरी शिवारातील जैनुद्दीन शेख यांच्या विहिरीत (ता. 8) घडली असून, उत्तम नारायण कांबळे (वय 55, रा. पिंपळगाव (दे) असे खून झालेल्या सालगड्याचे नाव आहे. शिवाजी भीमराव बोकेफोडे, रवी शिवाजी बोकेफोडे, आबा ऊर्फ राहुल उद्धव माने (रा. सर्व पिंपळगाव (दे) अशी संशयित आरोपींची नावे आहेत. 

हेही वाचा : ब्रेकिंग! अहिल्यादेवींच्या अध्यासन केंद्राचा प्रस्ताव विद्यापीठातच धूळखात पडून 

याबाबत पोलिसांनी सुरवातीला अनोळखी व्यक्तीचा अकस्मात मृत्यू म्हणून पांगरी पोलिसात गुन्हा नोंद केला. शवविच्छेदनानंतर खून झाल्याचे निष्पन्न झाले. यानंतर खुनाचा गुन्हा दाखल करण्यात आला. पोलिसांनी दोन पथके तयार करून शोध घेतला असता, पिंपळगाव येथील उत्तम नारायण कांबळे हा बेपत्ता असल्याचे त्याच्या नातेवाइकाकडून समजले. त्यानंतर अधिक चौकशीअंती उत्तम कांबळे हा शिवाजी भीमराव बोकेफोडे यांच्याकडे चार वर्षांपासून सालगडी म्हणून कामास होता. किरकोळ कारणावरून या दोघांत वाद झाला होता असे समजले. 

हेही वाचा : सरकारचे "यूजीसी'कडे बोट ! "एटीकेटी' विद्यार्थ्यांसमोर नवा पेच 

बेपत्ता झाला त्या दिवशी उत्तम कांबळे याच्या घरी शिवाजी बोकेफोडे याने रात्री अकरा वाजता त्याला मासे धरण्याचे कारण सांगून बाहेर नेल्याचे पोलिसांना समजले. पोलिसांनी शिवाजी बोकेफोडे यास ताब्यात घेऊन चौकशी केली असता, उत्तम कांबळे हा आपल्या पत्नी व मुलीची वारंवार छेड काढत होता. त्यामुळे त्याला (ता. 3) रक्षाबंधन दिवशी मुलगा रवी बोकेफोडे, आबा ऊर्फ राहुल उद्धव माने यांनी गोड बोलून मासे धरण्याचे कारण सांगून पांगरी परिसरातील विहिरीवर आणले. तेथील केबल वायरने उत्तम कांबळे याचा गळा आवळून खून केला व विहिरीतील पाण्यात त्याचा मृतदेह टाकण्यात आला. सहा दिवसांनंतर विहिरीतून वास येऊ लागल्यानंतर मृतदेह बाहेर काढून तपास करण्यात आला. अवघ्या सहा तासांत संशयित आरोपीस ताब्यात घेऊन पोलिसांनी तिघांवर खुनाचा गुन्हा दाखल केला. तपास पोलिस उपनिरीक्षक प्रवीण शिरसट करत आहेत. 

संपादन : श्रीनिवास दुध्याल