सोलापूर : कोरोना विषाणूचा प्रादुर्भाव रोखण्यासाठी देश लॉकडाउन करण्यात आला. कोरोनाची साखळी तोडण्यासाठी नागरिकांना घराबाहेर न पडण्याचे आवाहन करण्यात आले. तरी शहरातील नागरिक अद्यापही हा विषय गंभीरतेने घेत नसल्याचे दिसून येत आहे. जुने विडी घरकुलमधील नागरिकही विनाकारण रस्त्यावर फिरत असल्याने येथील अतुल्य सेवा प्रतिष्ठानचे संस्थापक श्रीनिवास यन्नम-कामटे यांनी घरासमोर स्पीकरद्वारे कोरोनाविषयी जनजागृती सुरू केली आहे. 
जुने विडी घरकुल येथील परिस्थिती पोलिसांची कारवाई सुरू असताना सुरवातीच्या दोन दिवसांत ठीक होती. नंतर पोलिस फिरकेनासे झाले व कारवाई होत नसल्याने नागरिकही बिनदिक्कत रस्त्यांवर दाटीवाटीने फिरत आहेत, दुचाकी घेऊन विनाकारण रपेट मारत आहेत. नागरिकांच्या या कृत्यामुळे कोरोनाचा संसर्ग वाढण्याचा धोका आहे. त्यामुळे श्री. यन्नम-कामटे यांनी पोलिस आयुक्तांना सायकलवर फिरून जनजागृती करण्याबाबत परवानगी मागितली आहे. मात्र, त्यांना अद्याप परवानगी न मिळाल्याने त्यांनी निदान आपल्या परिसरातील नागरिकांमध्ये "कोरोना'बाबत घ्यावयाच्या दक्षतेबाबत विडी घरकुल बी ग्रुप येथील गणेश मंदिर येथील घरासमोरच स्पीकर लावून जनजागृती सुरू केली आहे. 

पोलिस गेल्याबरोबर नागरिक बाहेर
जुने विडी घरकुल परिसर कामगारबहुल आहे. नागरिक अज्ञान व अशिक्षित असल्यामुळे त्यांना कोरोनाबाबत जास्त माहिती नाही. पोलिस येतात तेव्हा नागरिक घरी बसतात व पोलिस गेल्याबरोबर नागरिक पुन्हा परिसरात दाटीवाटीने वावरत आहेत. त्यामुळे माझ्या घरातील स्पीकरद्वारे कोरोनाबाबत जनजागृती सुरू केली आहे. पोलिस आयुक्तांनी परवानगी दिल्यास सुरक्षेची खबरदारी घेऊन मी शहरात सायकलवर फिरून जनजागृती करणार आहे. 
- श्रीनिवास यन्नम-कामटे, 
संस्थापक, अतुल्य सेवा प्रतिष्ठान