मोहोळ - टाकळी सिकंदर, ता. मोहोळ येथील भीमा सहकारी साखर कारखाना हा मल्टीस्टेट न होता तो सभासदांच्या मालकीचाच राहणार असुन सभासदांनी भुलथापांना बळी पडु नये, अशी ग्वाही कारखान्याचे अध्यक्ष विश्वराज महाडिक यांनी दिली.

भीमा साखर कारखाना हा मोहोळ, पंढरपुर व मंगळवेढा या तीन तालुकाच्या कार्यक्षेत्रात सहकारी तत्त्वावर सन1974 साली संस्थापक अध्यक्ष स्व. भीमराव (दादा) महाडिक यांनी प्रती दिन 1250 मेट्रीक टन क्षमतेचा परवाना मिळवुन स्थापन केला. त्याचा चाचणी हंगाम ही 1980 साली झाला. मध्यंतरीच्या कालावधीत गाळप क्षमता प्रतीदिन 2 हजार 500 मेट्रीक टन करण्यात आली.

सभासदांनी गळीत हंगाम 2011/12 मध्ये निवडणुकीत सभासदांनी विश्वास ठेवुन संसदरत्न खा. धनंजय ऊर्फ मुन्नासाहेब महाडिक यांच्याकडे कारखान्याची एक हाती सत्ता दिली. कारखान्यास ऊसाची उपलब्धता वाढल्याने सभासद व शेतकरी यांचा ऊस हा अतिरीक्त झाल्याने तो इतर कारखान्यास गाळपास द्यावा लागत होता. याचा विचार करुन गळीत हंगाम 2015/16 मध्ये कारखान्याची गाळप क्षमता 2500 मेट्रीक टनावरुन 5 हजार प्रतीदीन मेट्रीक टन गाळप क्षमता वाढविली.

सभासदांच्या ऊसास जास्तीत जास्त दर देता यावा म्हणुन 25 मेगॅवॅटचा सहविज निर्मीती प्रकल्प कार्यान्वीत झाला आहे. तसेच सन 2022 मध्ये झालेल्या पंचवार्षीक निवडणुकीत ही भरघोस मताने कारखान्याची सत्ता पुन्हा आमच्या हातात दिली.

या सभासदांच्या विश्वासास पात्र राहून सभासद व कामगारांना जास्तीत जास्तीत जास्त पैसे कसे देता येईल याचा विचार करुन 160 के.एल.पी.डी. चा असावणी प्रकल्प तसेच ईथेनॉल प्रकल्प मंजुरी करीता संबंधीत विभागाकडे शासन दरबारी त्याचे कामकाज चालु असुन तो लवकरच आपण उभारणी करीता घेत आहोत.

गेल्या 10 ते 15 दिवसा पासुन काही असंतुष्ट व्यक्ती हे कारखाना मल्टीस्टेट करणार आहेत अशा अफवा उठवित आहेत. परंतु असे काहीही न होता सभासदांनी ठेवलेल्या विश्वासा प्रमाणे कारखाना हा सहकारी तत्वावर व सभासदांच्या मालकीचाच राहणार असल्याचा पुनुरूच्चार कारखान्याचे अध्यक्ष विश्वराज महाडिक यांनी केला.