सोलापूर : राज्यात कोरोनाचा विस्फोट होतो की काय अशी परिस्थिती निर्माण झाली आहे. कोराना रुग्णांची वाढत आहे. काही जिल्हे लॉकडाउनही करण्यात आले आहेत. रुग्णसंख्येच्या तुलनेत काही जिल्ह्यांतील हॉस्पिटल्समध्ये बेडची संख्या कमी पडत आहे. यावरून सोलापूर जिल्ह्यातील माळशिरस तालुक्‍याचे आमदार राम सातपुते यांनी महाविकास आघाडी सरकारवर ट्विटरवरून हल्लाबोल केला आहे. 
 

आमदार राम सातपुते यांनी ट्विट करून ठाकरे सरकारवर टीका केली आहे. ते म्हणतात, "कोणी बेड देता का बेड? महाराष्ट्र सरकारच्या ढिसाळ कारभाराची आणि हप्तेखोरीची शिक्षा आज महाराष्ट्राच्या जनतेला भेटत आहे. शांतीच्या काळात हप्तेखोरीत व्यस्त ठाकरे सरकार.' 

राज्यात गेल्या 24 तासांत 43,183 नवे कोरोनाबाधित रुग्ण आढळले आहेत, तर 32,641 रुग्णांनी कोरोनावर मात केली असून त्यांना घरी सोडण्यात आलंय. गेल्या चोवीस तासांत 249 रुग्णांचा मृत्यू झाला आहे. गेल्या काही दिवसांपासून मृतांचा आकडा वाढला असल्याचं दिसत आहे. बुधवारी राज्यात हजारांच्या पुढे कोरोनाबाधित रुग्ण आढळले होते. त्यात गुरुवारी आणखी वाढ झाली आहे. आतापर्यंत राज्यात 28,56,163 कोरोनाबाधित रुग्णांची नोंद झाली आहे. राज्यात सध्या 3,66,533 कोरोनाचे सक्रिय रुग्ण आहेत, तर 54,898 रुग्णांचा आतापर्यंत कोरोनामुळे मृत्यू झाला आहे. 24,33,368 रुग्णांनी आतापर्यंत कोरोनावर मात केली आहे. गेल्या काही दिवसांपासून राज्यात कोरोनाबाधित रुग्णांची झपाट्याने वाढत आहे. त्यामुळे चिंता वाढली असून लोकांना कोरोना नियमांचे पालन करण्याचे आवाहन करण्यात आलंय. 

अशा परिस्थितीत भाजप आमदार राम सातपुते यांनी, महाराष्ट्र सरकारच्या ढिसाळ कारभाराची आणि हप्तेखोरीची शिक्षा आज महाराष्ट्राच्या जनतेला भेटत असल्याचा आरोप करून, शांतीच्या काळात हप्तेखोरीत ठाकरे सरकार व्यस्त असल्याचे टीका केली आहे.