मोहोळ(सोलापूर)ः अवैध धंदे व बेकायदेशीर दारू विक्री प्रकरणी पोलिसांकडून दारूबंदी समिती स्थापन करण्याची मोहिम सुरू करण्यात आली आहे. नागरिकांनी माहिती देताच पोलिस अवैध दारू विक्रीवर कारवाई करण्याच्या दृष्टीने सज्ज झाले आहेत. 

हेही वाचाः वैशाली डोंबाळे यांच्यामुळे विडी कामगारांच्या निऱाधार मुलांना आधार 

जिल्हा पोलीस अधीक्षक तेजस्वीनी सातपुते यांनी अवैधधंद्या विरोधात मोहीम उघडली असून, पोलीस ठाण्यातील सर्व पोलीस अधिकारी कर्मचाऱ्यांना सूचना दिल्या आहेत. अवैध व्यवसाया विरोधात अधीक्षक सातपुते यांनी आपल्याशी थेट संपर्काचे आवाहन करण्याच्या सूचना नागरिकांना दिल्या. त्याचाच एक भाग म्हणून आता गावोगावी मोहोळ पोलीस ठाण्याच्या वतीने दारूबंदी समित्या स्थापन होऊ लागल्या आहेत. तालुक्‍यातील पहिली समिती वाळूज ता. मोहोळ येथे स्थापन केल्याची माहिती पोलीस निरीक्षक सूर्यकांत कोकणे यांनी दिली. 

हेही वाचाः अतिवृष्टीनंतर आता द्राक्षबागांवर कीड रोगांचे संकट 

पोलिस अधिक्षक तेजस्वीनी सातपुते यांच्या आवाहनानुसार, वाळूज ता. मोहोळ येथे शाळेजवळच अवैध दारू विक्री सुरू असल्याची माहिती पोलिसांना देण्यात आली. तातडीने त्यांनी मोहोळचे पोलीस निरीक्षक कोकणे यांना कारवाईची सूचना दिली. काही वेळातच पोलीस त्या ठिकाणी पोहोचले व झाडाझडती घेतली असता त्याठिकाणी काही मिळून आले नाही. मात्र सदर विक्रेत्याला पोलिसी भाषेत समज देण्यात आली. 
दरम्यान पोलिस निरीक्षक कोकणे यांनी गावातील सर्व प्रतिष्ठित नागरिकांना बोलवून बैठकीचे आयोजन केले. यावेळी 12 सदस्यीय दारूबंदी समिती गठित केली. विष्णू महादेव मोटे यांच्याकडे अध्यक्ष तर सचिन हनुमंत मोटे यांच्याकडे समितीचे उपाध्यक्ष पद सोपविले. गावागावात आता अशा समित्या स्थापन करून अवैध व्यवसायाला लगाम घालण्याचा प्रयत्न पोलीस निरीक्षक कोकणे यांनी केला आहे. दरम्यान गावात कोणी असा अवैध व्यवसाय करीत असेल तर पोलिसांना कळवा त्याचे नाव गुप्त ठेवण्यात येईल असे त्यांनी सांगितले. यावेळी पोलीस निरीक्षक कोकणे यांच्यासमवेत डी बी पथकाचे शरद ढावरे, हवलदार प्रवीण साठे, गणेश दळवी उपस्थित होते.