सोलापूर : यावर्षी कोरोना विषाणूच्या जागतिक संसर्गामुळे जैन समाजातर्फे सोमवारी (ता. 6) साध्या पद्धतीने भगवान महावीर यांचा जयंती उत्सव साजरा करण्यात येणार आहे. जैन समाजबांधवांनी घरीच महावीरांची जयंती साजरी करावी. सकाळी 10.20 वाजता 20 माळांचा "ओम श्री श्री महावीर स्वामी अर्हते नमः' मंत्राचा जप करावा, असे आवाहन जैन श्‍वेतांबर मूर्तिपूजक संघाचे सचिव कल्पेश मालू यांनी केले आहे.

हेही वाचा - रस्त्यावर येणारी सर्व वाहने होत आहेत जप्त!

कोरोना विषाणू जगापासून दूर जाऊ दे...
सोमवारी सायंकाळी सात वाजता पाच दीप प्रज्वलित करावेत आणि "हे देवाधिदेव, सर्वोच्च महावीर स्वामी, आपण जन्मला तेव्हा जगातील सर्व प्राण्यांना शांतता होती. नरकीच्या प्राण्यांनीसुद्धा एक क्षण शांततेचा अनुभव घेतला. आज संपूर्ण जग कोरोना विषाणूमुळे दु:खी झाले आहे, काळजीत आहे. प्रभू, हा कोरोना विषाणू जगापासून दूर जाऊ दे आणि शांती जगावर असू दे. कोरोनामुळे त्रस्त झालेल्या आत्म्यांचे दु:ख दूर व्हावे,' अशी प्रार्थना देवाला करावी, असे आवाहनही श्री. मालू यांनी केले आहे.

महावीरांनी दाखवला जगाला प्रेम व शांतीचा मार्ग
शेवटचे जैन तीर्थंकर भगवान महावीर यांची जयंती हा जैन धर्मीयांचा मुख्य सण आहे. इतिहासविषयक जैन धर्मीय मान्यतेनुसार महावीरांचा जन्म इ.स.पू. 599 अथवा इ.स.पू. 615 मध्ये चैत्र शुद्ध त्रयोदशी या तिथीस झाला. भगवान महावीर यांनी तप व ज्ञानाच्या आधारे सर्व इच्छा व विकार यांच्यावर नियंत्रण मिळवले, त्यामुळे त्यांना "महावीर' म्हणून ओळखले जाते. त्यांनी जगाला प्रेम व अहिंसेचा मार्ग दाखवला.

दरवर्षी होत असते सामूहिक जयंती उत्सव साजरा
सोमवारी भगवान महावीर यांची जयंती आहे. जैन धर्मात महावीर जयंतीचे पर्व महापर्व म्हणून मानले जाते. सोलापुरात महावीर जयंती 1960 पासून साजरी केली जात आहे. दरवर्षी जैन श्‍वेतांबर मूर्तिपूजक संघातर्फे जोडभावी पेठ येथून रथयात्रा काढली जाते. या रथयात्रेत जोडभावी पेठ येथील आदिनाथ मंदिराची रथयात्रा सामील होते. ही रथयात्रा बाळीवेस, टिळक चौक मार्गे निघून माणिक चौक येथील आदिनाथ मंदिर येथे रथयात्रेचा समारोप होतो. जैन श्‍वेतांबर मूर्तिपूजक संघाच्या मिरवणुकीची सांगता जोडभावी पेठ येथील मंदिरात येते. यानंतर विविध धार्मिक कार्यक्रम, प्रसाद वाटप, रक्तदान शिबिर आदी कार्यक्रम पार पडतात. सायंकाळी पाळणा कार्यक्रम होतो. मात्र या वर्षी कोरोना विषाणूच्या संसर्गामुळे भगवान महावीर यांची जयंती साध्या पद्धतीने साजरी करण्यात येणार आहे.