भोसे (ता. मंगळवेढा, जि. सोलापूर) ः शिरनांदगी (ता. मंगळवेढा) येथे चिकनगुनिया साथीने थैमान घातले आहे. घरटी एक - दोन रुग्ण आढळत असताना आरोग्य विभागाचे दुर्लक्ष झाल्याने येथील ग्रामस्थांना स्वखर्चाने मंगळवेढा येथे जाऊन खासगी रुग्णालयात उपचार घेण्याची वेळ आली आहे. त्यामुळे शिरनांदगीकर ग्रामस्थांतून संतापजनक प्रतिक्रिया व्यक्त होत आहेत. 

महिनाभरापासून शिरनांदगी ग्रामस्थांना चिकनगुनिया ताप, थंडी, अंगदुखी, सांधेदुखी आदी आजाराने पछाडले आहे. शिरनांदगी गाव भोसे प्राथमिक आरोग्य केंद्राच्या रड्डे उपकेंद्रांतर्गत येते. गावात आरोग्य विभागाचा कर्मचारी अजिबात फिरकत नसल्याने येथील ग्रामस्थांना अनेक समस्यांना सामोरे जावे लागत आहे. महिनाभरापासून शिरनांदगी येथे चिकनगुनियाची साथ पसरली असताना आरोग्य विभागाकडे वेळोवेळी मागणी करून देखील धूर फवारणी, औषध उपचार, लसीकरण आदी कोणत्याही सुविधा रुग्णांना मिळाल्या नाहीत. येथील रुग्णांना स्वखर्चाने मंगळवेढा येथे जाऊन उपचार घ्यावे लागत आहेत. जिल्हा परिषदेचे उपाध्यक्ष व आरोग्य समितीचे सभापती दिलीप चव्हाण यांच्या मतदारसंघातील या गावात आरोग्यसेवेचा बोजवारा उडाल्याने ग्रामस्थांतून संताप व्यक्त होत आहे 

रुग्णांची सोय होण्याकरिता भोसे प्राथमिक आरोग्य केंद्रातील आरोग्यसेवकांना गावांत येऊन परिस्थितीची पाहणी करून फवारणी घेण्याविषयी चार ते पाच वेळा सांगितले. आमचे काम नाही, ग्रामपंचायतने फवारणी करावी, अशी उलट उत्तरे ते देतात. आरोग्य विभागाच्या कारभारामुळे ग्रामस्थ हैराण झाले असून वरिष्ठ अधिकाऱ्यांनी लक्ष घालावे. 
मायाक्का थोरबोले, सरपंच, शिरनांदगी 

शिरनांदगी येथील चिकनगुनियाच्या साथीबाबत ग्रामस्थांकडून माहिती मिळाली आहे. गावात जाऊन तातडीने भोसे प्राथमिक आरोग्य केंद्रातील कर्मचाऱ्यांना उपचार करण्याचे आदेश दिले आहेत. 
दिलीप चव्हाण, जिल्हा परिषद उपाध्यक्ष व आरोग्य समिती सभापती, सोलापूर जिल्हा परिषद