सोलापूर : क्वारंटाईन केलेल्या दोन तरुणांना काल सोमवारी दुपारी "निगेटिव्ह' असल्याचे सांगत त्यांना सोडण्यात आले, मात्र रात्री प्रसिद्ध झालेल्या यादीत या दोन्ही तरुणांचा अहवाल पॉझिटीव्ह असल्याचे जाहीर झाल्याने त्या दोघांना पुन्हा उपचारासाठी शासकीय रुग्णालयात दाखल करण्यात आले आहे.  तत्पूर्वी या दोघांनीही आपल्या अनुभवाची माहिती व्हिडीअोच्या माध्यमातून नगरसेवक गुरुशांत धुत्तरगावकर यांच्याकडे पाठवली आहे. गेल्या काही दिवसांपासून सोलापुरात "निगेटीव्ह' आणि "पॉझिटीव्ह'वरून बराच गोंधळ सुरु आहे. त्यातच बाधीत रुग्णाच्या वास्तव्याच्या परिसराचे नाव प्रसिद्ध करण्यातही चुका होत असल्याने गोंधळ वाढू लागला आहे. 

रविवार पेठ परिसरात वास्तव्यास असणाऱ्या दोन युवकांना पोलिस प्रशिक्षण केंद्रात क्वारंटाईन करण्यात आले होते. काल या दोघांनाही "निगेटीव्ह' असल्याचा दाखला देत, त्यांना होम क्वारंटाईन करीत, तसा शिक्का त्यांच्या हातावर मारला व त्यांना सोडून देण्यात आले. त्यामुळे ते दोघेही आनंदाने घरी परतले. मात्र रात्री जिल्हा प्रशासनाने प्रसिद्ध केलेल्या यादीत या दोघांचीही नावे "पॉझिटीव्ह' रुग्णांच्या अहवालात आल्याने त्यांना पुन्हा उपचारासाठी दाखल करण्यात आले आहे. असाच प्रकार काही दिवसांपूर्वी याच परिसरातील महिला रुग्णाबाबत झाला होता. या महिलेचा अहवाल निगेटीव्ह असल्याचे सांगून तिला घरी सोडण्यात आले. त्यानंतर ही महिला कुटुंबियांमध्ये रमली, गल्ली बोळातही अनेकांशी तिने संवाद साधला. दरम्यान, दुसऱ्याच दिवशी या महिलेचा अहवाल पॉझिटीव्ह असल्याचे सांगत तिला पुन्हा ताब्यात घेण्यात आले. त्यामुळे प्रसिद्ध होणाऱ्या अहवालावरून गोंधळ निर्माण होऊ लागला आहे. सोलापुरात कोरोना बाधित रुग्णांची संख्या सातत्याने वाढत आहे. त्यामुळे शासकीय रुग्णालयातील वैद्यकीय यंत्रणेवर प्रचंड ताण आहे. मात्र अशा पद्धतीचे अहवाल येऊ लागल्याने गोंधळात भर पडू लागली आहे. या संदर्भात शासकीय रुग्णालयातील वैद्यकीय अधीक्षक डॉ. औदुंबर मस्के यांच्याशी संपर्क होऊ शकला नाही. 

अहवालाचा गोंधळ सुरु असतानाच बाधित रुग्णाच्या परिसराचाही उल्लेख अनेकवेळा चुकीचा होऊ लागला आहे. मध्यंतरी खुद्द जिल्हाधिकारी मिलिंद शंभरकर यांना "शांतीनगर' नव्हे "शास्त्रीनगर' असा खुलासा करावा लागला होता. काल बुधवार पेठ परिसरासंदर्भातही असाच गोंधळ झाला. बाधित रुग्ण हे बुधवार पेठ मिलिंदनगर भागातील सात पुरुष व पाच महिला असल्याचे म्हटले होते. प्रत्यक्षात हे रुग्ण न्यू बुधवार पेठ परिसरातील असल्याचे स्पष्ट झाले. एकुणच कोरोना रुग्णांचे अहवाल आणि त्यांच्या वास्तव्याच्या परिसराचा चुकीचा उल्लेख यावरून मोठा गोंधळ होऊ लागला आहे. 

बाधित रुग्णांचे अहवाल अचूक असावेत यासाठी जिल्हा प्रशासनाने शासकीय रग्णालयातील संबंधित विभागाशी समन्वय ठेवावा. त्यामुळे बाधित रुग्णांमध्ये गोंधळ होणार नाही, तसेच चुकीचा अहवाल आला तर त्याचे परिणाम त्या परिसरातील नागरिकांना भोगावे लागणार नाहीत. 
- गुरुशांत धुत्तरगावकर, नगरसेवक