वाळूज(सोलापूर)ः येथील सारी व कोरोना बाधीत एैंशी वर्षीय महिला व त्यांचा 47 वर्षीय मुलगा या माय-लेकराने एकाच वेळी दोन आजारावर मात केली आहे. त्यांना दवाखान्यातून घरी पाठवण्यात आले. दोन आजाराच्या तावडीतून सुटका झालेल्या या माय लेकराचे कुटूंबीयांकडून त्यांचे औक्षण, फुलांची उधळण करून आणि फुलांच्या पायघड्यावर स्वागत करण्यात आले. 

हेही वाचाः अवैध वाळू उपसा करणाऱ्या पाच ट्रॅक्‍टरचालकाविरूध्द या पोलिसांची कारवाई 

19 जून रोजी वाळूजमध्ये एका ऐंशी वर्ष वयाच्या महिलेस कोरोनाची लागण झाल्याची घटना घडली होती. ही वृध्द महिला सोलापूर येथील खासगी दवाखान्यात मणक्‍याच्या उपचारासाठी गेलेली होती. तेथे या महिलेस कोरोना रोगाची बाधा झाल्याचा तपासणी अहवाल सुरुवातीला आला होता. त्यानंतर या महिलेच्या कुटुंबातील तेरा व्यक्तींना क्वारंटाईन करण्यात आले होते.  या प्रकारामुळे अख्खा गाव हादरून गेला. त्यानंतर या महिलेची सारी आजाराबाबतीच तपासणी केली तेव्हा सारी अहवाल पॉझिटिव्ह आढळला. तातडीने या वृध्द महिलेवर उपचार सूरू झाले. 

हेही वाचाः कोरोना संकटात उच्च, तांत्रिक शिक्षणाच्या शुल्कात कपात करणार कधी? कोणी मांडला प्रश्‍न ते वाचा 

कोरोना प्रतिबंधात्मक उपाय म्हणून या महिलेच्या कुटुंबातील क्वारंटाईन केलेल्या 13 सदस्यांचे स्वॅब तपासणीसाठी घेण्यात आले. त्यामध्ये या महिलेच्या 47 वर्षीय धाकट्या मुलास कोरोना लागण झाल्याचा कोरोना पॉझिटिव्ह असल्याचा अहवाल आला. त्यानंतर सदरील वृध्द महिला व त्यांच्या कोरोना पॉझिटिव्ह मुलावरही उपचार सूरू होते. महिलेवर उपचार पूर्ण झाल्यानंतर त्या सारी आजारातून बऱ्या झाल्या. तसेच त्यांच्या मुलावर कोरोना आजाराचे उपचार झाले. चार दिवसानंतर या मुलांचा कोरोना अहवाल निगेटिव्ह आला. दोघेही रुग्ण बरे झाल्याने रुग्णालयाने तपासणी करून त्यांना वाळूजला घरी पाठवण्यास परवानगी दिली. गुरूवारी (ता.2) रोजी रात्री हे मायलेक गावात दाखल झाले. त्यांच्या कुटुंबियांनी त्यांचे फुले उधळून आणि औक्षण करून स्वागत केले.