सोलापूर ः सोलापुरात कोरोनामुळे एका व्यक्तीचा मृत्यू झाला आहे. त्याच्या संपर्कात आलेल्या 91 जणांची चाचणी केली होती. त्यापैकी 90 जणांचे अहवाल निगेटिव्ह आले आहेत. मात्र, एका महिलेचा चाचणी अहवाल पॉझिटिव्ह आला आहे. त्या महिलेच्या संपर्कात 16 जण आल्याची माहिती जिल्हाधिकारी मिलिंद शंभरकर यांनी दिली. 

मृत झालेल्या व्यक्तीच्या संपर्कात एकूण 143 जण आले होते. त्यापैकी 91 जणांचे अहवाल प्राप्त झाले आहेत. त्यापैकी 90 जणांचे अहवाल निगेटिव्ह आहेत. उर्वरित 52 जणांचे अहवाल उद्या (बुधवारी) प्राप्त होतील, अशी माहितीही जिल्हाधिकारी शंभरकर यांनी दिली. 
आज सकाळी एका महिलेचा अहवाल कोरोना पॉझिटिव्ह आला. त्यानंतर त्या महिलेच्या संपर्कात किती जण आले आहेत, याची चौकशी केली असता त्या महिलेच्या संपर्कात 16 जण आल्याचे प्राथमिक तपासणीत दिसून आले आहे. त्यामुळे त्यांना आयसोलेशन वॉर्डमध्ये ठेवले आहे. त्यांची चाचणी केली आहे. त्याचा अहवाल उद्या (बुधवारी) अपेक्षित आहे. 

सोलापुरातील तेलंगी पाच्छा पेठ येथील 56 वर्षीय किराणा दुकानदाराचा मृत्यू झाल्यानंतर हा दुकानदार कोरोनाबाधित असल्याचे समोर आले होते. जिल्हा प्रशासनाच्यावतीने तेलंगी पाच्छा पेठ येथून एक किलोमीटर परिसर प्रतिबंध क्षेत्र म्हणून घोषित केला आहे. पाच्छा पेठ परिसराचे पूर्ण सर्वेक्षण महापालिकेच्यावतीने करण्यात आले आहे. त्यासाठी 72 टीम तयार करण्यात आल्या होत्या. त्याद्वारे सात हजार 262 घरांचे सर्वेक्षण पूर्ण झाले आहे. त्यात 46 हजार 435 व्यक्तींचा सर्व्हे करण्यात आला आहे. त्यामध्ये 41 व्यक्तींना किरकोळ आजार असल्याचे लक्षात आल्याने त्यांना प्राथमिक आरोग्य केंद्रात पाठविले आहे. तर तीन व्यक्तींना सिव्हिलमध्ये पाठविले असल्याचेही जिल्हाधिकारी शंभरकर यांनी सांगितले. 

सोलापुरातील कोरोनाची स्थिती 

• आतापर्यंत होम क्वारंटाइनमध्ये दाखल ः 1042 
• होम क्वारंटाइनचा कालावधी पूर्ण ः 462 
• अद्यापही होम क्वारंटाइनमध्ये असलेले ः 580 
• आतापर्यंत इन्स्टिट्यूशनल क्वारंटाइनमध्ये दाखल ः 595 
• कालावधी पूर्ण झालेले ः 216 
• अद्यापही इन्स्टिट्यूशनल क्वारंटाइनमध्ये असलेले ः 379 
• आतापर्यंत आयसोलेशनमध्ये असलेले ः 395 
• अहवाल प्राप्त ः 325 निगेटिव्ह, दोन पॉझिटिव्ह 
• अहवाल अप्राप्त ः 52