सोलापूर : कोरोनाची टेस्ट करायच्या भानगडीत पडू नका, नाहीतर विनाकारण चांगले असतानाही रिपोर्ट पॉझिटिव्ह येईल, अशी पोस्ट फेसबूकवरुन व्हायरल करणाऱ्या सोलापुरातील सचिन जन्मले (वय-40) याच्याविरुध्द जोडभावी पोलिसांत गुन्हा दाखल झाला आहे. 

हेही नक्‍की वाचा : महाविद्यालयीन परीक्षेबाबत निर्णय ! उच्च शिक्षणमंत्री म्हणाले... 

सोलापूरचे पोलिस आयुक्‍त अंकूश शिंदे यांनी सोशल मिडियावर नजर ठेवण्यासाठी सायबर सेलमध्ये स्वतंत्र कर्मचारी नियुक्‍त केले आहेत. नियिमतपणे आक्षेपार्ह पोस्टवर त्यांच्या माध्यमातून लक्ष ठेवले जात आहे. आतापर्यंत सोलापुरातील चार जणांविरुध्द अफवा पसरविल्याप्रकरणी गुन्हे दाखल झाले आहेत. दरम्यान, मंगळवारी (ता. 14) सायंकाळी सातच्या सुमारास जन्मले याने स्वत:च्या फेसबूक अकाउंटवर एक पोस्ट व्हायरल केली. त्यामध्ये त्याने कोरोनाची टेस्ट विनाकारण कोणीही करु नये, अन्यथा चांगले असतानाही रिपोर्ट पॉझिटिव्ह येतील, असे त्यात नमूद केले होते. पोलिसांनी ती पोस्ट काढून टाकली असून जन्मले याला ताब्यात घेतले आहे. राष्ट्रीय आपत्ती व्यवस्थापन कायद्यानुसार त्याच्याविरुध्द गुन्हा दाखल करण्यात आला असून आता त्याला एक महिन्याचा तुरुंगवास तर दोनशे रुपयांचा दंडाची शिक्षा ठोठावली जाईल, अशी माहिती सायबर पोलिस ठाण्याचे वरिष्ठ पोलिस निरीक्षक अरुण फुगे यांनी पत्रकाद्वारे स्पष्ट केले. 

हेही नक्‍की वाचा : लॉकडाउनमुळे देशाला सात ते आठ लाख कोटींचा फटका 

24 तासांत 64 जणांविरुध्द गुन्हे 
कोरोनाच्या विषाणूचा प्रादुर्भाव होणार नाही याची खबरदारी म्हणून पोलिस आयुक्‍तांनी सोलापूर शहरातील सात पोलिस ठाण्याअंतर्गत आठ ठिकाणी नाकाबंदी लावली आहे. त्यामध्ये मागील 24 तासांत संचारबंदीचे उल्लंघन केल्याप्रकरणी 63 तर आपत्ती व्यवस्थापन कायद्याचे उल्लंघनप्रकरणी एकाविरुध्द गुन्हा दाखल करण्यात आला आहे. त्यामध्ये फौजदार चावडी पोलिसांनी 27, जेलरोड पोलिसांनी 12, विजापूर नाका पोलिसांनी 14, सलगर वस्ती पोलिसांनी एक, एमआयडीसी पोलिसांनी नऊ जणांविरुध्द गुन्हे दाखल केल्याचे पोलिस आयुक्‍तालयाने सांगितले.