केत्तूर (सोलापूर) : आषाढातील शेवटचे दोन दिवस शिल्लक आहेत. त्यानंतर श्रावण महिन्याला सुरवात होत आहे. श्रावण महिन्यात शुद्ध शाकाहार पाळणाऱ्यांसाठी आषाढ महिन्याचा शेवटचा दिवस रविवारी (ता. 19) आल्याने मांसाहारी "आषाढ संडे' साजरा करण्याच्या तयारीत आहेत. त्यामुळे मटन, मासे, अंडी व चिकनला मोठी मागणी असल्याचे चित्र सध्या दिसून येत आहे. 

हेही वाचा : "या' शहरवासीयांनी घेतलंय मनावर... घरातच लॉकइन राहून करणार कोरोनाला हद्दपार! कसे? वाचा सविस्तर 

आषाढ महिन्यातील शेवटचा रविवार म्हणजे आखाड पार्टीचा दिवस! मात्र तो या वर्षी "आषाढ संडे' म्हणूनच साजरा होणार आहे. सोमवारी अमावास्या आहे व मंगळवारपासून श्रावण महिना सुरू होत असल्याने ग्रामीण भागातील नागरिकांनी मांसाहारावर ताव मारण्याचा बेत आखला आहे. बोकडाच्या मटनापेक्षा नागरिकांची मासे खाण्यालाच पसंती राहणार आहे. सध्या बोकडाच्या मटनाचे दर 600 ते 650 रुपये किलो, चिकनचा दर 200 ते 220 रुपये किलो तर माशांचे दर 80 ते 100 रुपये किलो असे आहेत. यावर्षी पावसाने वेळेवर सलामी दिल्याने बळिराजा समाधानी व खुशीत आहे. अशा परिस्थितीत गावरान कोंबड्यांना मागणी वाढली आहे; परंतु गावरान कोंबडा 500 ते 550 रुपये तर गावरान कोंबडी 350 ते 400 रुपये दराने विकली जात असल्याने हे दर मात्र सर्वसामान्यांच्या आवाक्‍याबाहेरच आहेत. 

हेही वाचा : "या' तालुक्‍यात पावसाची दमदार हजेरी, मात्र शेतातील तण नष्ट करण्याचे शेतकऱ्यांसमोर आव्हान 

आषाढ महिन्यानंतर श्रावण महिना सुरू होतो. त्यानंतर गणेशोत्सव, नवरात्र उत्सव यामुळे बहुतांश नागरिक या काळामध्ये मांसाहार करीत नाहीत. त्यामुळे रविवारी आखाड साजरा करण्यासाठी हॉटेल, ढाबे यांना पसंती दिली जाते. तर ग्रामीण भागात एकत्रित येऊन बाहेर आखाड साजरा करण्याची परंपरा आहे. परंतु या वर्षी कोरोना विषाणूचा वाढता संसर्ग व जमावबंदी यामुळे या ठिकाणी होणाऱ्या पार्ट्यांना मात्र "ब्रेक' बसला आहे. त्यामुळे आखाड पार्टी घरच्या घरी व कुटुंबीयांसमवेत साजरी करण्याची वेळ मात्र आली आहे. येथे मात्र काही जणांवर काही बंधने येणार आहेत. 

संपादन : श्रीनिवास दुध्याल