पंढरपूर(सोलापूर) ः धाराशिव साखर कारखाना युनिट 3 शिवणी (जा) कारखान्यात यंदाच्या हंगामात सुमारे पाच लाख मेट्रिक टन उसाचे गाळप करणार असल्याची माहिती कारखान्याचे अध्यक्ष अभिजित पाटील यांनी दिली. 

हेही वाचाः करमाळ्यात कोरोनाची पॉवर होतेय कमी, मात्र आगामी सणामध्ये घ्यावी लागणार काळजी 

नांदेड जिल्ह्यातील धाराशिव साखर कारखाना युनिट3 च्या सन 2020-21 पहिल्या गळीत हंगामाचा शुभारंभ आज प्रगतशील शेतकऱ्यांच्या शुभहस्ते करण्यात आला. 
याप्रसंगी कारखाना लगत असलेल्या जिरगा मारूती मंदिरात अभिषेक करण्यात आला. काटा पुजन करून ऊस भरून आलेल्या वाहनांचे पुजन करून व ऊस गव्हाणीत टाकण्यात आला. 
कारखाना भागातील प्रगतशील शेतकऱ्यांना मोळी टाकण्याचा मान देण्यात आल्यामुळे कारखान्याचे अध्यक्ष अभिजीत पाटील यांचे यावेळी अनेकांनी कौतुक केले. 

हेही वाचाः मंदिरे बंद असण्याच्या काळाचा भाविकांना चांगल्या सुविधा देण्यासाठी उपयोग कराः डॉ.निलम गोऱ्हे 

प्रगतशील शेतकरी म्हणून कैलासगिर महाराज, व्यंकटराव आरसुळे, नामदेवराव गवते, तुकाराम लुटे, शिवाजी चव्हाण, रामराव वाके, व्यंकटराव कदम, एकनाथ ढोणे, ज्ञानेश्वर जामगे, नागनाथ कुसनुरे, नागोराव घुमे, पंढरी वानखेडे, रामराव पवार, गंगाधर बोमनाळे, ज्ञानेश्वर देसाई तसेच कारखान्याचे अध्यक्ष अभिजीत पाटील, कार्यकारी संचालक अमर पाटील, संचालक संतोष काबंळे, सुहास शिंदे व गौरव दोशी, छावा संघटनचे माऊली पवार आदी मान्यवरांच्या शुभहस्ते मोळी टाकण्यात आली. 
याप्रसंगी बोलताना कारखान्याचे अध्यक्ष अभिजीत पाटील म्हणाले, यंदा पाऊस चांगला झाल्याने शेतकऱ्यांत आनंदाचं वातावरण आहे. ऊस टनेजमध्ये ही भरपूर प्रमाणात वाढ आहे. यंदा ऊसाचे क्षेत्र जास्त असल्याने भागातील सर्व शेतकऱ्यांचा ऊस कारखान्यास गाळपास आणू. शेतकऱ्यांच्या ऊसाला चांगला भाव देऊन येथील शेतकऱ्यांला सुजलाम सुफलाम करू. पुढील काही दिवसांपासून ऊस उतारा जास्त मिळावा यासाठी प्रशिक्षण कार्यशाळा गावोगावी घेण्यास येईल. 
यावर्षी पाच लाख मे. टन गाळप करण्याचे उद्दिष्ट आहे. कर्मचारी व शेतकरी हा कारखानदारीचा कणा आहे. या सर्वांच्या सहकार्याने गळीत हंगाम यशस्वी होईल असा विश्वास त्यांनी व्यक्त केला. यावेळी भागातील सरपंच, उपसरपंच, सदस्य, अधिकारी, कर्मचारी, शेतकरी व वाहतूक ठेकेदार आदी उपस्थित होते.  
 

संपादनः प्रकाश सनपूरकर