धाराशिव: जिल्ह्यातील १० कृषिसेवा केंद्रांचे परवाने निलंबित करण्यात आले आहेत. तर तीन केंद्रांना ताकीद देण्यात आली आहे. ऐन पेरणीच्या तोंडावर परवाने निलंबित झाल्याने कृषिसेवा केंद्रांचे धाबे दणाणले आहेत. जिल्हा अधीक्षक कृषी अधिकारी रवींद्र माने यांनी ही कारवाई केली आहे.

जिल्ह्यात कृषिसेवा केंद्राच्या माध्यमातून शेतकऱ्यांना खत, बियाणे तसेच औषधांचा पुरवठा केला जातो. मात्र काही कृषिसेवा केंद्रचालक गडबड करतात. खत, बियाणे जास्तीच्या दराने शेतकऱ्यांना देतात. इ-पॉस मशीननुसार साठा न जुळणे, रजिस्टरला खताच्या विक्रीची नोंद नसणे.

तर काही केंद्रावर बनावट औषधांची विक्री करण्याचे प्रकार घडतात. जिल्ह्यातील निलंबित १० कृषिसेवा केंद्रचालकांमध्ये तुळजापूर तालुक्यातील सहा, भूम तालुक्यातील तीन तर लोहारा तालुक्यातील एक कृषिसेवा केंद्राचा समावेश आहे. शिवाय उमरगा तालुक्यातील एका आणि भूम तालुक्यातील दोन कृषी सेवा केंद्रांना ताकीद देण्यात आली आहे.

कारवाई सुरूच राहणार

पेरणीचा हंगाम सुरू होत आहे. या काळात शेतकऱ्यांची फसवणूक होण्याचे प्रकार वाढतात. याला आळा घालण्यासाठी कृषी विभागाकडून वेगवान मोहीम राबविली जात आहे. त्यामुळे कोणत्याही कृषिसेवा केंद्राने याबाबत बनावटगिरी करू नये. अन्यथा कारवाईला सामोरे जावे लागेल असा इशारा कृषी विभागाकडून देण्यात आला आहे.

शेतकऱ्यांनी काय काळजी घ्यावी

शेतकऱ्यांनी खते, औषधे तसेच बियाणे खरेदी करताना पावती घ्यावी. शिवाय अधिकृत कृषिसेवा केंद्रातून निविष्ठांची खरेदी करावी. खताची खरेदी केल्यानंतर इ-पॉस मशिनची पावती घ्यावी. तसेच बियाण्याची पावती हंगाम संपेपर्यंत जपून ठेवणे आवश्‍यक आहे.