सोलापूर: कोरोना आपत्तीमुळे सलग दुसऱ्या वर्षीदेखील पूर्व भागातील विविध विणकर समाजांचे रथोत्सव साजरा करण्यास मनाई आहे. भाविकांसाठी मंदिरे बंदच राहणार असल्याने भाविकांना घरीच सण साजरा करावा लागणार आहे.

पूर्व भागात पद्मशाली, कुरुहिनशेट्टी (जाण्ड्रा), (कुरनी), स्वकुळसाठी, नीलकंठ, नीलगार, तोगटवीर, मडिवाळेश्‍वर परिट अशा विविध समाजांचे श्रावण महिन्यात रथोत्सव असतात. यानिमित्ताने सवाद्य मिरवणुका काढण्याची परंपरा आहे. कोरोना आपत्तीमुळे गतवर्षी मंदिरे उघडण्यास मनाई होती. त्यामुळे श्रावण महिन्यात होणारे रथोत्सव साजरा होऊ शकले नाहीत. यंदादेखील शासनाने मंदिरे बंद ठेवण्याचे धोरण अवलंबिले आहे. त्यामुळे गतवर्षीप्रमाणे यावर्षीदेखील रथोत्सवांना फाटा दिला जाणार आहे.

दरम्यान प्रशासनाकडून या समाजांना त्यांच्या मंदिरांमध्ये धार्मिक विधी करण्यास सशर्त परवानगी राहणार आहे. त्यानुसार पुरोहित व मोजके पदाधिकारी यांनाच मंदिरात प्रवेश राहील. सामान्य भक्तांना मंदिरात जाण्यास मनाई राहणार आहे. सामान्य भाविकांची होणारी गैरसोय लक्षात घेऊन अनेक समाजांकडून धार्मिक विधींचे स्थानिक चॅनेलवरून तसेच फेसबुक लाईव्हद्वारे प्रक्षेपण करण्याची सोय करण्यात येणार आहे. त्यामुळे भाविकांना घरबसल्या देवाचे दर्शन घेता येईल.

पद्मशाली समाज

पद्मशाली समाजाचे कुलदैवत मार्कंडेय महामुनींचा रथोत्सव दरवर्षी नारळी पौर्णिमेला साजरा केला जातो. यंदा रविवार (ता. 22) ऑगस्ट रोजी पौर्णिमा आली आहे. सिद्धेश्‍वर पेठेतील मार्कंडेय मंदिरातील महारुद्राभिषेक, होमहवन आदी विधींचे चॅनल-फेसबुक लाईव्हद्वारे दर्शनाची सोय करण्यात येणार आहे, अशी माहिती पद्मशाली ज्ञाती संस्थेचे अध्यक्ष महेश कोठे व सरचिटणीस सुरेश फलमारी यांनी दिली.