सोलापूर :  अधिकाऱ्यांच्या बनावट स्वाक्षरी करून सुमारे दोन कोटींचा गैरव्यवहार केल्याच्या प्रकरणातील दोषींवर चौकशीअंती फौजदारी गुन्हे दाखल करण्याचे आदेश आयुक्त दीपक तावरे यांनी आज दिले. दरम्यान, या प्रकरणाच्या चौकशीसाठी तीन सदस्यीय समितीची नियुक्ती करण्यात आली आहे. ज्यांना महापालिकेचे विश्वस्त म्हणून नेमले आहे त्यांनीच हा प्रकार केल्याचा संशय असल्याने घरचाच रखवाला वैरी झाला आज... म्हणण्याची वेळ सोलापूरकरांवर आली आहे. 

हे आधी वाचा - कुंपणच खाई शेत, त्याला नाही लाज...

विभागीय कार्यालय क्रमांक एकमध्ये झाला प्रकार 
विभागीय कार्यालय क्रमांक एकअंतर्गत प्रभाग चारमध्ये विकास कामे करण्यात आली व त्याचे बिल उचलण्यात आले. मात्र त्यासाठी सार्वजनिक आरोग्य अभियंता आणि विभागीय अधिकाऱ्यांच्या बनाटव सह्या करण्यात आल्याचा प्रकार नगरसेवक आनंद चंदनशिवे आणि चेतन नरोटे यांनी गेल्या शनिवारी झालेल्या महापालिकेच्या सभेत उघडकीस आणला होता. त्यावर जोरदार चर्चा झाली आणि संबंधितांवर गुन्हे दाखल करण्याची मागणी सर्वच सदस्यांनी केली. त्यानुसार महापौर श्रीकांचना यन्नम यांनी याप्रकरणाची चौकशी करून संबंधित दोषींवर फौजदारी गुन्हे दाखल करण्याचे आदेश दिले. 

हेही वाचा - घरभेदी कारभाऱ्यांमुळे उत्पन्नावर परिणाम 

महापौरांच्या आदेशानुसार आयुक्तांची कारवाई 
महापौरांनी दिलेल्या आदेशाच्या अनुषंगाने आयुक्त श्री. तावरे यांनी या प्रकरणाच्या चौकशीसाठी तीन सदस्यीय समितीची नियुक्ती केली आहे. तत्पुर्वी या प्रकरणाशी संबंधित विभागीय अधिकारी मोहन कांबळे आणि श्री. कामत यांच्याबरोबर त्यांनी चर्चा केली. एमआयएमचे गटनेते रियाज खरादी यांनी या प्रकरणातील दोषींवर गुन्हे दाखल करण्याची मागणी आयुक्तांकडे केली होती. आज श्री. चंदनशिवे व श्री. नरोटे यांनी या प्रकरणातील दोषींवर तातडीने गुन्हे दाखल करण्याची मागणी केली आणि संबंधित घटनेतेली काही पुरावे आयुक्तांकडे सादर केले. त्यानुसार या प्रकरणातील दोषींवर गुन्हे दाखल होण्याची शक्‍यता आहे