सोलापूर : हातातोंडाशी आलेले द्राक्ष आणि केळीचे पीक गेल्या आठवड्यातील अवकाळी पावसाने हिरावून नेले. ज्यांच्या बागा वाचल्या ते शेतकरी आता कोरोनाच्या संकटात सापडले आहेत. सोलापूरची द्राक्ष आणि केळी ज्या देशात निर्यात होतात, त्या देशांनी कोरोनाच्या भीतीने लॉकडाऊन केले आहे. त्याचा परिणाम विमानामार्गे होणाऱ्या निर्यातीवर झाला आहे. जहाजातून होणारी निर्यात सध्या तरी सुरू आहे. कोरोनाच्या पार्श्‍वभूमीवर जागतिक पातळीवर येत्या दोन ते तीन दिवसांत काय निर्णय होतात? याकडे जिल्ह्यातील निर्यातदार शेतकऱ्यांचे लक्ष लागले आहे. 
हेही वाचा - "कोरोना नाही तरी" या शहरातील उद्योग-व्यवसायाला फटका 
द्राक्ष, डाळिंब आणि केळी अशा तीन महत्त्वाच्या फळपिकांसाठी सोलापूर जिल्ह्याची ओळख आहे. जिल्ह्यातील ज्या डाळिंब उत्पादक शेतकऱ्यांनी मृग बहार घेतला, त्यांच्या डाळिंबाची यापूर्वीच विक्री झाल्याने ते निश्‍चिंत आहेत. आंबिया बहारातील शेतकऱ्यांचे डाळिंब बाजारात येण्यास आणखी विलंब आहे. त्यामुळे डाळिंब उत्पादक शेतकरी कोरोनाच्या संकटातून वाचले आहेत. द्राक्ष उत्पादक शेतकऱ्यांना मात्र कोरोनाचा त्रास सहन करावा लागत आहे. सोलापूर जिल्ह्यातील करमाळा, माढा आणि माळशिरस या तालुक्‍यांतील केळीची इराण, बांगलादेश या देशांमध्ये मोठ्या प्रमाणात निर्यात होते. कोरोनामुळे या देशांतील निर्यातीवर परिणाम होत असल्याचे समोर आले आहे. 
हेही वाचा - त्याच्या शिक्षणासाठी भावाने सोडले शिक्षण 
सोलापूर जिल्ह्यातील बार्शी, माळशिरस आणि पंढरपूर तालुक्‍यातील द्राक्षाची मोठ्या प्रमाणात निर्यात होते. या देशातील द्राक्ष बांगलादेश, आखाती देश, युरोपीय देश, युनायटेड नेशन या भागात निर्यात केले जातात. या देशांवरही कोरोनाचे संकट घोंघावत असल्याने त्याचा परिणाम कृषी मालाच्या निर्यातीवर होऊ लागला आहे. कोरोनाचा संसर्ग रोखण्यासाठी या देशांनी विमानसेवा बंद ठेवण्याचा व कमी करण्याचा निर्णय घेतला आहे. त्यामुळे या देशात विमानामार्गे जाणाऱ्या शेतमालावर मर्यादा आल्या आहेत. 

 महाराष्ट्र