पंढरपूर (सोलापूर) : या वर्षीच्या गळीत हंगामामध्ये सोलापूर जिल्ह्यातील (Solapur) जो साखर कारखानदार (Sugar Mill) पहिल्यांदा एफआरपीची संपूर्ण रक्कम ऊस उत्पादक शेतकऱ्यांच्या बॅंक खात्यावर 14 दिवसांच्या आत जमा करेल, अशा साखर कारखानदाराच्या नावावर स्वत:ची एक एकर जमीन करण्याचा निर्णय पंढरपूर (Pandharpur) तालुक्‍यातील सुस्ते या गावातील विजयकुमार नागटिळक (Vijaykumar Nagtilak) या शेतकऱ्याने जाहीर केला आहे. त्यांच्या या आगळ्यावेगळ्या निर्णयाची सर्वत्र चर्चा सुरू झाली आहे. या ऊस उत्पादक शेतकऱ्याने साखर कारखानदारांना दिलेले खुले आव्हान साखर कारखानदार स्वीकारणार का, याकडेच आता पंढरपूरसह सोलापूर जिल्ह्यातील शेतकऱ्यांचे लक्ष लागले आहे.

राज्यात सर्वाधिक साखर कारखाने आहेत व सर्वाधिक ऊस उत्पादन सोलापूर जिल्ह्यात होते. उसाचा दर आणि शेतकरी संघटनेचे आंदोलन हे नेहमीच चर्चेचा विषय असतो. यावर्षीही एफआरपीच्या मुद्द्यावरून शेतकरी संघटना विरुद्ध साखर कारखानदार यांच्यात संघर्ष अटळ मानला जात आहे. अशातच सुस्ते येथील एका शेतकऱ्याने चक्क साखर कारखानदारांना एक एकर जमीन बक्षीस म्हणून देण्याचे जाहीर केले आहे.

जो कोणी साखर कारखानदार पहिल्यांदा एफआरपीची रक्कम 14 दिवसांच्या आत शेतकऱ्यांच्या खात्यावर जमा करेल त्या साखर कारखानदाराच्या नावावर स्वतःची एक एकर जमीन देणार आहे. त्यांचे हे ओपन चॅलेंज सोलापूर जिल्ह्यातील साखर कारखानदार स्वीकारणार का, याविषयी आता ऊस उत्पादक शेतकऱ्यांमध्ये चर्चा सुरू झाली आहे. सोलापूर जिल्ह्यात जवळपास 40 साखर कारखाने आहेत. या कारखान्यांमधून दरवर्षी एक कोटी टनाहून अधिक उसाचे गाळप होते. सर्वाधिक ऊस आणि साखर उत्पादन करणाऱ्या सोलापूर जिल्ह्यातील ऊस उत्पादक शेतकऱ्यांना नेहमीच साखर कारखानदारांविरुद्ध ऊस दरावरून संघर्ष करावा लागतो. आता हा संघर्ष शेतकऱ्यांना नकोसा झाला आहे. त्यामुळे आता थेट नागटिळक या शेतकऱ्याने साखर कारखानदारांना खुले आव्हान देत कोंडीत पकडले आहे. त्यांचे हे खुले आव्हान सोलापूर जिल्ह्यातील किती साखर कारखानदार स्वीकारणार, याकडेच सोलापूर जिल्ह्यातील हजारो ऊस उत्पादक शेतकऱ्यांचे लक्ष लागले आहे.