माळीनगर : चालू गळीत हंगामात विना परवाना ऊस गाळप केल्याबद्दल साखर आयुक्तांनी कारखान्यांना दणका दिला आहे. राज्यातील १६ साखर कारखान्यांना साखर आयुक्त शेखर गायकवाड यांनी ६१ कोटी ३३ लाख ६३ हजार रुपयांचा दंड ठोठावला आहे. त्याबाबत संबंधित साखर कारखान्यांना नोटिसा देण्यात आल्या आहेत. सोलापूर जिल्ह्यातील सर्वाधिक सात कारखान्यांना दंड झाला आहे.

दंड झालेल्या अन्य साखर कारखान्यांमध्ये पुणे जिल्ह्यातील चार, सांगली जिल्ह्यातील दोन तर उस्मानाबाद, सातारा व हिंगोली जिल्ह्यातील प्रत्येकी एका कारखान्यांचा समावेश आहे. यापैकी नऊ कारखान्यांना डिसेंबरमध्ये तर सात कारखान्यांना जानेवारीत दंडाचे आदेश देण्यात आले आहेत. दंड झालेल्या साखर कारखान्यांमध्ये प्रामुख्याने राष्ट्रवादी काँग्रेस व भाजपमधील मातब्बर व प्रभावशाली नेत्यांच्या नेतृत्वाखाली कार्यरत असलेले कारखाने समाविष्ट आहेत.

दंड झालेले कारखाने व कंसात रक्कम (रुपयांमध्ये)

• पुणे जिल्हा : कर्मयोगी शंकरराव पाटील, इंदापूर (सहा कोटी ८५ लाख ७२ हजार). नीरा भीमा, इंदापूर (एक कोटी २७ लाख ६१ हजार). छत्रपती सहकारी, इंदापूर (दोन कोटी दोन लाख ९२ हजार ५००). घोडगंगा सहकारी, शिरूर (दोन कोटी ६० लाख ४५ हजार)

• सोलापूर जिल्हा : इन्द्रेश्वर शुगर, बार्शी (चार कोटी ७९ लाख २१ हजार). सहकार शिरोमणी, पंढरपूर (एक कोटी ९४ लाख ६७ हजार ५००). श्री मकाई, करमाळा (पाच कोटी ६३ लाख दोन हजार ५००). भीमा सहकारी, मोहोळ (६७ लाख पाच हजार). श्री शंकर सहकारी, माळशिरस (आठ कोटी ९५ लाख ६४ हजार). विठ्ठल रिफाइनड, करमाळा (एक कोटी ४७ लाख ७७ हजार ५००). संत दामाजी, मंगळवेढा (दोन कोटी ६४ लाख १० हजार)

• सांगली जिल्हा : पद्मभूषण नागनाथअण्णा नायकवडी हुतात्मा किसन अहिर, वाळवा (चार कोटी १३ लाख २५ हजार). विश्वासराव नाईक, शिराळा (सात कोटी ५७ लाख ७० हजार)

• सातारा जिल्हा : शरयू ॲग्रो इंडस्ट्रीज, फलटण (सहा कोटी २६ लाख ३५ हजार)

• उस्मानाबाद जिल्हा : भीमाशंकर शुगर, वाशी (७९ लाख ४० हजार)

• हिंगोली जिल्हा : टोकाई सहकारी,वसमतनगर (तीन कोटी ६८ लाख ७५ हजार

''विना परवाना गाळप केल्याप्रकरणी दंड झालेल्या सर्वच कारखान्यांनी शासनाकडे अपील केले आहे. त्यामुळे दंडाची वसुली झाली नाही.''

- शेखर गायकवाड, साखर आयुक्त