सोलापूर - अक्कलकोट इथं गेल्या ११ दिवसांपासून शेतकऱ्यांचे आंदोलन सुरु आहे. मातोश्री साखर कारखान्याला उस विकणाऱ्या शेतकऱ्यांनी थकीत उसबिलाची रक्कम मागणी करण्यासाठी आंदोलन केलं. यावेळी शेतकऱ्यांसोबत बोलण्यासाठी गेलेल्या माजी मंत्र्यांची जीभ घसरली. दरम्यान, या शेतकऱ्यांच्या भेटीसाठी गेलेल्या माजी गृहराज्य मंत्री आणि काँग्रेस नेते सिद्धराम म्हेत्रे यांची जीभ घसरली. रागाच्या भरात त्यांनी शेतकऱ्यांनाच शिवी दिल्याची घटना घडली आहे. याचा व्हिडिओ सध्या सोशल मीडियावर व्हायरल होत आहे.

अक्कलकोट इथं म्हेत्रे यांनी शेतकऱ्यांची भेट घेतली. तेव्हा बोलत असताना मधेच शेतकऱ्यांनी मोठ्याने बोलून अडथळा आणल्यानं रागावलेल्या म्हेत्रे यांनी अपशब्द वापरले. सिद्धराम म्हेत्रे यांनी आघाडी सरकारच्या काळात गृहराज्यमंत्री पद भूषवलं होतं. तसंच अक्कलकोट विधानसभा मतदारसंघातून तीन वेळा निवडणूकही जिंकली होती.

सिद्धराम म्हेत्रे बोलताना म्हणाले की, सगळे शांत बसा, मी बोलत असताना मधे बोलून कोणाला पुढारीपणा करायचा असेल तर आताच कारखान्याला आग लावतो. तितका मी कडू आहे. या कारखान्यावर माझं पोट भरत नाही, पाच वर्षे... (असं बोलत असतानाच मधेच एक शेतकरी मोठ्याने ओरडला) तेव्हा राग अनावर झालेल्या म्हेत्रे यांनी शेतकऱ्याला शिवी दिली. याचा व्हिडिओ व्हायरल झाल्यानंतर शेतकऱ्यांमधून संताप व्यक्त केला जात आहेत.