करमाळा :करमाळा तालुक्यात केळी लागवडीचे क्षेञ साधारणपणे 7 हजार हेक्टर झाले असुन या भागातील केळी मोठ्याप्रमाणात निर्यात होत आहे.त्यामुळे शेलगाव (वां) येथे केळी संशोधन केंद्र स्थापन करावे अशी  माजी आमदार नारायण पाटील यांनी उपमुख्यमंत्री देवेंद्र फडणवीस यांच्या कडे केली.

माजी आमदार नारायण पाटील यांनी मुंबई येथू उपमुख्यमंत्री देवेंद्र फडणवीस यांची प्रत्यक्ष भेट घेऊन करमाळा मतदार संघातील प्रलंबित प्रश्नांची सोडवण्याची मागणी केली आहे. याबाबत माहिती देताना माजी आमदार नारायण पाटील यांनी सांगितले की, करमाळा तालुक्यातील शेलगाव (वां) येथे केळी संशोधन केंद्र निर्माण व्हावे अशी आपण 2018 पासुन मागणी करत आलो आहोत.

करमाळा तालूका हा जसा ऊसाचा पट्टा म्हणून ओळखला जातो अगदी तसेच मागील काही वर्षांपासून करमाळा तालुक्यातील केळी लागवड व उत्पादन क्षेत्रात वाढ झाली आहे. उजनी बॅकवाटरसह तालुक्यातील पुर्व भागातील शेतकऱ्यांना आता केळी या पिकापासून आर्थिक फायदा मिळू लागला आहे. मागील वर्षापेक्षा यंदा केळीचे क्षेत्र जास्त आहे. सन 2021-22 या वर्षात 6671 हेक्टर क्षेत्र केळी लागवडी खाली आले होते तर  सन 2022-23 या वर्षात यात वाढ होऊन 6978 हेक्टर क्षेत्र केळी लागवडीखाली आहे. केळीचे सरासरी उत्पादक हे प्रति हेक्टरी 69 टन इतके आले.

यासाठी केळीच्या विविध जातीची 1 कोटी 32 लाख 75 हजार 136 इतक्या रोपांची लागवड करण्यात आली. यामुळे  तालुक्यात केळीचे  उत्पन्न  केळी बाबत अधिक माहिती मिळावी, केळीच्या नवीन जातींवर संशोधन व्हावे, केळीवरील रोग व किडीवर अत्याधुनिक औषधासह उपचार पद्धती शोधून काढता यावी म्हणून एका सुसज्ज केळी संशोधन केंद्राची गरज असुन आपण ही मागणी लावून धरली आहे.याबाबत उपमुख्यमंत्री देवेंद्र फडणवीस हे सकारात्मक असून लवकरच याबाबत कार्यवाही करु असे आश्वासन त्यांनी दिले असल्याचे माजी आमदार नारायण पाटील यांनी सांगितले.