बार्शी (सोलापूर) : गारअकोले (ता. माढा) येथील कै. दादासाहेब केचे पतसंस्थेच्या संचालकांनी पिंपळवाडी येथील शेतकऱ्याला "जमीन विक्री केलेले सात लाख रुपये रक्कम पतसंस्थेत ठेवा, आम्ही दामदुप्पट देतो', असे आमिष दाखविले. संचालक मंडळाने ही रक्कम ठेव म्हणून ठेवली. मात्र 21 लाख 80 हजार 84 रुपये होऊनही पैसे दिले नाहीत. त्यामुळे विश्वासघात, अपहार करून फसवणूक केल्याप्रकरणी माढा न्यायालयाने आदेश देताच पतसंस्थेच्या अध्यक्षासह 12 संचालकांविरुद्ध टेंभुर्णी पोलिस ठाण्यात फसवणुकीचा गुन्हा दाखल झाला आहे. 

हेही वाचा : सावधान..! मोहोळमध्ये बिबट्याची सुरू झाली दहशत; पाडला शिंगरूचा फडशा 

पतसंस्थेचे अध्यक्ष अशोक केचे, संचालक बाळू आजिनाथ केचे, सुधाकर केचे, सुमन केचे, प्रकाश केचे, महादेव गायकवाड, विराज केचे, विलास केचे (रा. शेवरे, ता. माढा), स्वप्नाली केचे, पृथ्वीराज केचे, संगीता केचे, विष्णू शिंदे (रा. नागोरली, ता. माढा) अशी गुन्हा दाखल झालेल्यांची नावे आहेत. शेतकरी रामेश्वर प्रल्हाद घुबे (रा. पिंपळवाडी, ता. परंडा) हे पतसंस्थेचे अध्यक्ष व संचालक मंडळाच्या संपर्कात आले होते. घुबे यांनी त्यांच्या पत्नीच्या नावावर असलेली जमीन सात लाख रुपयांना विक्री केली होती. पतसंस्थेचे अध्यक्ष व संचालक मंडळाने पैसे पतसंस्थेत ठेवीमध्ये ठेवा, पाच वर्षात दामदुप्पट होईल असे आमिष दाखविले होते. दामदुप्पट रक्कम मिळणार असल्याने घुबे यांनी सात लाख रुपये 27 डिसेंबर 2011 रोजी ठेवीमध्ये गुंतवणूक केली होती. पतसंस्थेत 2016 मध्ये रक्कम दुप्पट झाल्यानंतर पैशाची मागणी केली; पण अध्यक्षासह संचालक मंडळाने पैसे देण्यास टाळाटाळ केली. 

हेही वाचा : मोठी ब्रेकिंग! "एमपीएससी' परीक्षेचा तिढा उच्च न्यायालयात; "ही' संघटना आज दाखल करणार याचिका 

2016 ते 2020 पर्यंत ही रक्कम 21 लाख 80 हजार 545 रुपये झाली. रक्कम देण्यास विनंती केली, वारंवार पाठपुरावा केला तरीही पैसे देण्यास असमर्थता दर्शवली. माढा न्यायालयात ऍड. नागराज शिंदे (बार्शी) व ऍड. एस. आर. सोनमाळी (परंडा) यांच्या वतीने रामेश्वर घुगे यांनी फसवणूक केल्याची तक्रार दाखल केली. न्यायालयाने अध्यक्षासह संचालक मंडळावर गुन्हा दाखल करून तपास करण्याचे आदेश टेंभुर्णी पोलिसांना देताच गुन्हा दाखल झाला आहे. 

संपादन : श्रीनिवास दुध्याल