मळेगाव (सोलापूर) : बार्शी तालुक्‍यातील (Barshi Taluka, Solapur) मळेगाव (Malegaon) येथील शांतकुमार हरिश्‍चंद्र पाडुळे (वय 35) या तरुण शेतकऱ्याचा आपल्या द्राक्ष बागेतील फवारणीच्या तयारीला असताना विजेचा धक्का लागून जागेवरच मृत्यू झाला. एकुलता एक, हाताला आलेला तरुण मुलगा गेल्याने पाडुळे कुटुंबावर दुःखाचा डोंगर कोसळला. ही दुःखद घटना समजताच कर्मवीर ना. मा. गडसिंग गुरुजी विद्यालयात शांतकुमारसोबत शिक्षण घेतलेले 2000-01 च्या दहावी बॅचचे वर्गमित्र मदतीला धावून आले आहेत.

वर्गमित्राच्या अचानक जाण्याने पाडुळे कुटुंबावर आभाळ कोसळून कुटुंबाचा एकमेव असलेला आधार नाहीसा झाला आहे. अशा वेळी वर्गमित्र उमेद प्रतिष्ठानचे अध्यक्ष उमेश घोलप, संताजी आलाट (महाराष्ट्र पोलिस), मेजर पद्मसिंह गडसिंग, मेजर सचिन वायकर, श्रीहरी दळवी यांनी व्हॉटसऍप ग्रुपवर विविध क्षेत्रात कार्यरत असलेल्या मित्रांना मदतीचे आवाहन केले. या आवाहनाला योग्य तो प्रतिसाद देत वर्गमित्रांनी एक लाख सात हजारांची मदत गोळा केली. सेंट्रल बॅंक ऑफ इंडिया, बार्शी शाखेत कै. शांतकुमार पाडुळे यांच्या पत्नी राणी पाडुळे यांच्या नावे 50 हजारांची व सुकन्या योजनेतून चार वर्षांची मुलगी सई पाडुळे हिच्या नावे 57 हजारांची रक्कम जमा करण्यात आली. सोमवारी (ता. 2) सर्व वर्गमित्रांनी शांतकुमारच्या घरी जाऊन आई रंजना पाडुळे यांच्याकडे बॅंक पासबुक सुपूर्द करीत मानसिक आधार दिला. शांतकुमारने 35 वर्षाच्या आयुष्यात कमावलेल्या मैत्रीच्या धाग्याने संकटाच्या घडीला पाडुळे कुटुंबाला आर्थिक मदत करून उभारी देण्याचे काम केले, हे अभिमानास्पद व प्रेरणादायी आहे. सईचे पालकत्व स्वीकारून भविष्यात देखील पाडुळे कुटुंबाला मुलाची उणीव जाणवू देणार नाहीत, असे आश्वासन वर्गमित्रांनी दिले.

संकटाच्या समयी जो धावून येतो तोच खरा जिवलग मित्र असतो, हे या वर्गमित्रांनी लाख मोलाच्या मदतीद्वारे दाखवून दिले आहे. या वेळी उमेश घोलप, संताजी आलाट, मेजर पद्मसिंह गडसिंग, तानाजी इंगोले, विशाल चापले, राजकुमार आपुणे, सोमनाथ ढाळे, बालाजी आलाट, दिनेश थोरात, सचिन पवार, बापू पवार, राजाभाऊ गडसिंग, कृष्णा सुरवसे, दुर्गाप्पा धोत्रे, प्रमोद माने, भैय्या माने, विकास सुरवसे, निखील आलाट उपस्थित होते.