सोलापूर : घरात गौरी-लक्ष्मीचा सण असल्याने दरवाजा अर्धवट उघडा ठेवून घरातील सदस्य हॉलमध्ये झोपी गेले. अनोळखी चोरट्याने घरात प्रवेश करून कपाटातील चार लाख 85 हजार रुपयांचे दागिने लंपास केले. ही घटना 26 ऑगस्ट रोजी रात्री साडेअकरा ते 27 ऑगस्ट रोजी पहाटे साडेचारच्या सुमारास घडली. घरात गौरी-लक्ष्मी आल्याने या काळात घराचे दरवाजे लावू नयेत, त्यामुळे घरातून लक्ष्मी निघून जाते असाच काहीसा समज आजही शहरी व ग्रामीण भागात आहे. 
संतोष नामदेव वाघमारे (वय 45, रा. गोकुळ सोसायटी, जुळे सोलापूर) यांनी विजापूर नाका पोलिसात फिर्याद दिली आहे. चोरट्याने नऊ तोळ्याच्या सोन्याच्या पाटल्यांचे दोन जोड, सहा तळ्याच्या बांगड्या, अर्ध्या तोळ्याचे कानातील एक जोड, पिळ्याच्या चार अंगठ्या, लक्ष्मी व गणपतीची चांदीची मूर्ती, चांदीच्या निरंजनाचे एक जोड, चांदीचे पंचपाळ व पाच हजार रुपये रोख अशा ऐवजाची चोरी केली आहे.