सोलापूर : ‘तुझ्या माहेरच्यांनी विवाहात चांगला मानपान केला नाही, समीर हा सरकारी नोकरीला असल्याने हुंडा देणारे अनेकजण भेटले असते. आता माहेरून दहा लाख रुपये आण, नाहीतर खुलानामा देऊन घर सोडून जा’ असे म्हणून सासरच्यांनी छळ केल्याप्रकरणी एमआयडीसी पोलिसांत १५ जणांवर गुन्हा दाखल झाला आहे.

विवाहानंतर (१९९७ पासून) पती, सासू, नणंद अशा १५ जणांनी विवाहात मानपान न करता तुझ्या आई-वडिलांनी आमची फसवणूक केली असे म्हणत शिवीगाळ, दमदाटी करीत जीवे ठार मारण्याची धमकी दिली, अशी फिर्याद नसीम समीर पठाण (रा. शिवगंगा नगर भाग-३, नई जिंदगी) यांनी पोलिसांत दिली. तसेच आम्हाला आता स्वतंत्र घर, घरजागा घ्यायची आहे, तु तुझ्या वडिलांकडून दहा लाख रुपये आण म्हणून शारीरिक व मानसिक त्रास दिला. तुझी आई राहात असलेले घर आमच्या नावे कर किंवा जागेच्या किंमतीएवढी रक्कम आम्हाला आणू दे, नाहीतर खुलानामा देऊन घर सोडून जा म्हणून त्यांनी वारंवार दमदाटी केली. तु मुलांना घेऊन कोठेतरी निघून जा म्हणूनही त्यांनी दमदाटी केली. त्यांनी जबरदस्तीने सोन्याचे दागिने घेऊन शिवीगाळ केल्याचेही फिर्यादी नसीम पठाण यांनी पोलिसांना सांगितले. त्यावरून पती समीर महेबूब पठाण, सासू रजिया महेबूब पठाण, नणंद महेरून मुल्ला व तिचा पती मौला मुल्ला, शबाना दुर्वेस, तिचा पती बाकरहुसेन दुर्वेस, दीर जाकीर पठाण, जमीर पठाण, दिराचा मुलगा सलमान पठाण, पतीच्या मामाचा मुलगा गुलामहुसेन करणकोट, मामाची मुले रहिम, सादिक, मुन्ना, ईस्माईल कादर शेख अशा १५ जणांवर गुन्हा दाखल झाला आहे. पोलिस हवालदार गुलचंद पवार तपास करीत आहेत.

माहेरून पैसे आण म्हणून विवाहितांचा छळ

घर, जागा, जमीन, घरजागा, वाहन, नवीन व्यवसायासाठी माहेरून पैसे आण म्हणून विवाहितांचा सासरच्यांकडून छळ केला जात असल्याच्या तक्रारींत मोठी वाढ झाली आहे. कोरोनाच्या दोन वर्षाच्या संकटानंतर आर्थिक चणचणींचा सामना करणाऱ्यांच्या कुटुंबात त्याचे प्रमाण जास्त असल्याची स्थिती आहे. काही तक्रारींवर पोलिस आयुक्तालय, पोलिस अधीक्षक कार्यालयातील महिला सुरक्षा कक्षाकडून यशस्वी तोडगा काढला. अनेकांचे तुटत असलेले संसार पुन्हा जोडले, पण बऱ्याच जणांनी आपापसात मिटवून घेतलेले नाही.