- प्रमिला चोरगी

Solapur News : शहरातील ६० टक्के वाहतूक रिंगरोडमार्गे वळविण्यात आली. त्यामुळे जडवाहतुकीमुळे होणारे अपघात कमी वाटत असले तरी शहरातून जाणाऱ्या राष्ट्रीय महामार्गांच्या रचनेमुळे अपघातात मृत्यू पावणारे, गंभीर जखमी होणाऱ्यांची संख्या दिवसेंदिवस वाढत आहे. या वर्षात विव्हको प्रोसेस कंपनीजवळ, महालक्ष्मी मंदिर चौक, जुना बोरामणी नाका या तीन अपघात प्रवण क्षेत्रात नव्याने वाढ झाली आहे.

शहर वाहतूक नियंत्रण विभागाने नुकताच शहरातील अपघात प्रवण क्षेत्राचा आढावा घेतला. यामध्ये शहरात तीन ब्लॅक स्पॉट वाढल्याचे निदर्शनास आले. आजमितीला शहरात एकूण १८ ब्लॅक स्पॉट आहेत. त्यात नव्याने तीन ब्लॅक स्पॉटची वाढ होऊन २१ ब्लॅक स्पॉट झाले आहेत. शहराला वळसा घालून जाण्यासाठी सहा महिन्यांपूर्वी रिंगरोड अस्तित्वात आले.

त्यामुळे शहरातून जाणारी ६० टक्के जडवाहतूक या बाह्यवळणामुळे कमी झाली. त्यामुळे होटगी रोड, विजापूर रोड आणि हैदराबाद रोड या तीन मार्गावरील छोट्या-मोठ्या अपघातांचे प्रमाण कमी झाले. मात्र शहरातून जाणाऱ्या राष्ट्रीय महामार्गावरील सर्व वळण रस्ते, प्रवेश, मोक्याच्या ठिकाणी दिशादर्शक फलक नसणे.

एखादा अपघात झाल्यानंतर पुन्हा त्याठिकाणी अपघात घडू नये, यासाठी कार्यवाही न करणे, नियमबाह्य गतीरोधक, रस्ते दुरुस्ती, नो पार्किंग झोनकडे दुर्लक्ष आदींमुळे ब्लॅक स्पॉटच्या संख्येत वाढ झाल्याचे दिसून येते. त्यामुळे सदर ठिकाणी वाहने चालविताना नागरिकांनी वाहने सावकाश चालवावीत तसेच सर्व सिग्नलचे पालन करण्याची गरज आहे.

या मार्गावर काळजी घ्यावीच

बाळे ब्रीज, मार्केट यार्ड, केगाव ब्रीज, मडके वस्ती, हिप्परगा ब्रीज, डी मार्ट, शिवाजी चौक, जुना पुना नाका या परिसरातून जाताना वाहतुकीच्या नियमांचे पालन करावे. शहरातील १८ ब्लॅकस्पॉटपैकी सर्वाधिक अपघात अन॒ मृत्यू झालेल्यांची संख्या अधिक आहे. त्यामुळे या मार्गावरून वाहन चालविताना काळजी घ्यावी.

नव्याने वाढलेले तीन ब्लॅक स्पॉट

• विव्हको प्रोसेस

• महालक्ष्मी मंदिर

• जुना बोरामणी नाका

कमी झालेले दोन ब्लॅक स्पॉट

• हत्तूर क्रॉस रोड

• शांती चौक