अक्कलकोट : तुला लई मस्ती आली आहे का?, राम मंदिर प्रतिष्ठापना जोरात करतो का?, असे म्हणून युवकास लोखंडी कोयत्याने, रॉडने, काठीने, सोडा बाटलीने मारहाण करून गंभीर जखमी केल्याची घटना बुधवार (ता. ३१) रात्री सात वाजता येथील समर्थ चौकांत घडली. फिर्यादी युवकावर गंभीर हल्ला केल्याप्रकरणी सुमारे दहाजणांवर गुन्हा दाखल करण्यात आला आहे.

फिर्याद सोमशंकर भुअगप्पा किवडे, (वय २८, अक्कलकोट) यांनी दिली आहे. हल्ला करणाऱ्या संशयित आरोपींची नावे समीर जमादार, मुज्जु टिनवाला, तक्कु घोळसगांवकर, टिनवालाचा भाऊ (नाव माहिती नाही), समीर शेख, जावेद फुलारी, रियाज बागवान, मुस्तकी मुजावर व इतर तीन ते चार लोक (सर्व रा. अक्कलकोट) अशी आहेत.

३० जानेवारी रोजी सायंकाळी सात वाजण्याच्या सुमारास फिर्यादी अक्कलकोट येथील समर्थ चौकात डेअरीसमोर थांबला असताना संशयित आरोपी समीर जमादार, मुज्जू टिनवाला (दोघे रा. मुजावर गल्ली, अक्कलकोट) यांनी फिर्यादी सोमशंकर भुअगप्पा किवडे यास ३० लिटर दुधाची ऑर्डर आहे, असे सांगून मुजावर गल्ली कमानीजवळ प्रवीण कटारे यांच्या घरासमोर घेऊन गेले.

त्यानंतर समीर जमादार, मुज्जू टिनवाला, तक्कू घोळसगावकर, टिनवालाचा भाऊ (नाव माहिती नाही), समीर शेख, जावेद फुलारी, रियाज बागवान, मुस्तकी मुजावर (सर्व रा. अक्कलकोट) व इतर तीन ते चार लोकांनी गैरकायद्याचा जमाव जमवून फिर्यादीस गंभीर मारहाण करून जखमी केले. या घटनेमुळे संपूर्ण शहरात तणावाचे वातावरण आहे. समाजात रोष निर्माण झाल्याने पोलिसांनी शहरात कडक बंदोबस्त ठेवलेला आहे. उपविभागीय पोलिस अधिकारी विलास यामावार व पोलिस निरीक्षक राजेंद्र टाकणे हे स्वतः परिस्थिती हाताळत आहेत. याप्रकरणी फिर्यादीने अक्कलकोट उत्तर पोलिस ठाण्यात तक्रार दिली आहे. तपास पोलिस उपनिरीक्षक चंद्रकांत पुजारी करीत आहे.