पंढरपूर (सोलापूर) : पंढरपूर (Pandharpur) येथील एसटी (ST Depot) आगारातील दशरथ खंडू गिड्डे (Dashrath Gidde) (वय 42) या कर्मचाऱ्याने राहत्या घरी आज (बुधवार) पहाटे गळफास लावून आत्महत्या केली आहे. आत्महत्येचे कारण मात्र अद्याप समजू शकलेले नाही.

दशरथ गिड्डे हे पंढरपूर येथील एसटी आगारात यांत्रिकी विभागात सहाय्यक मेकॅनिक म्हणून गेल्या तीन वर्षांपासून काम करत होते. आज पहाटे त्यांनी आपल्या राहत्या घरी गळफास लावून आत्महत्या केली आहे. त्यांच्या पश्‍चात पत्नी व दोन लहान मुले आहेत.

मूळचे मोहोळ येथील असलेले दशरथ गिड्डे हे मागील काही दिवसांपासून मानसिक तणावामध्ये होते. त्यातूनच त्यांनी ही आत्महत्या केली असावी, अशी शक्‍यता आहे. मागील काही दिवसांपासून एसटी कर्मचाऱ्यांना वेळेवर पगार मिळत नसल्याने कर्मचारी तणावात आहेत. त्यातूनच अनेक ठिकाणी आत्महत्यांचे सत्र सुरू झाले आहे. अशातच आज पंढरपुरातील यांत्रिक विभागात काम करणाऱ्या एका कर्मचाऱ्याने आत्महत्या केल्याने एसटी विभागामध्ये खळबळ उडाली आहे.

या प्रकरणी पंढरपूर शहर पोलिस ठाण्यात अकस्मात मृत्यू अशी नोंद करण्यात आली असून, पोलिस पुढील तपास करत आहेत.