महूद (सोलापूर) : खांद्यावर पक्षाचा झेंडा व छातीवर पक्षाचे चिन्ह मिरवून जनहिताची कामे करणाऱ्या कॉंग्रेस (Congress) पक्षाच्या हिंमतवान तरुण कार्यकर्त्यांना येत्या निवडणुकांमध्ये संधी देण्यात येणार आहे. तेव्हा जिल्ह्यातील तरुण कॉंग्रेस कार्यकर्त्यांनी बदलासाठी सज्ज व्हावे, असे आवाहन कॉंग्रेसचे जिल्हाध्यक्ष डॉ. धवलसिंह मोहिते- पाटील (Dr. Dhawalsingh Mohite- Patil) यांनी सांगोला (Sangola) येथील कार्यकर्ता संपर्क मेळाव्यात बोलताना केले.

जिल्हा कॉंग्रेसचे अध्यक्ष डॉ. मोहिते-पाटील व कॉंग्रेसचे प्रांतिक सदस्य प्रा. प्रबुद्धचंद्र झपके यांच्या मार्गदर्शनाखाली सांगोला तालुक्‍यात गेल्या तीन दिवसांपासून कॉंग्रेस पक्षाचे जनसंपर्क अभियान सुरू होते. याची सांगता सांगोला येथील कविराज मंगल कार्यालयात कार्यकर्ता संपर्क मेळाव्याने झाली. यावेळी व्यासपीठावर प्रांतिक सदस्य प्रा. प्रबुद्धचंद्र झपके, माजी आमदार विश्वनाथ चाकोते, रामहरी रूपनवर, महिला कॉंग्रेसच्या जिल्हाध्यक्षा शाहीन शेख, अल्पसंख्याक सेलचे जिल्हाध्यक्ष वसीम पठाण, तालुका अध्यक्ष सुनील भोरे, जिल्हा उपाध्यक्ष हरिभाऊ पाटील, सांस्कृतिक विभागाचे प्रदेश उपाध्यक्ष महादेव कांबळे, रवींद्र कांबळे, शहराध्यक्ष तोहित मुल्ला, नगरपालिका महिला व बाल कल्याण सभापती अनुराधा खडतरे, महिला आघाडीच्या जिल्हा उपाध्यक्षा मैना बनसोडे, शहर आघाडीच्या अध्यक्षा स्वाती अंकलगी आदी उपस्थित होते.

डॉ. मोहिते-पाटील म्हणाले की, जिल्ह्याच्या अनेक भागात हक्काचा लोकप्रतिनिधी नसूनही पक्षावर प्रेम करणारी जनता मोठ्या प्रमाणावर आहे. अशा एकनिष्ठ लोकांबरोबर काम करताना आनंद वाटत आहे. आज बोलणाऱ्याचे काही पण विकले जात आहे, हे केंद्रातील सरकारकडे पाहून लक्षात येते, असेही ते म्हणाले.

माजी आमदार रामहरी रूपनवर म्हणाले, कॉंग्रेस पक्षाने जनतेच्या हिताचा वसा घेऊन दुसऱ्या स्वातंत्र्याची चळवळ सुरू केली आहे. माझ्या मनात येते तेच तुम्ही ऐका, अशी ही "मन की बात' सुरू आहे. या देशात शेतकऱ्यांवर हल्ला करणारे, त्यांना चिरडून मारणारे मोकाट फिरत आहेत. देशातील कायद्याची स्थिती नाजूक झाली असून, देश हुकूमशाहीकडे वाटचाल करतो आहे. प्रतापसिंह मोहिते- पाटील कॉंग्रेसचे जिल्हाध्यक्ष असताना त्यांनी जिल्ह्यात कॉंग्रेसला एका उंचीवर नेऊन ठेवले होते. तोच इतिहास पुन्हा घडत असून, त्यांचे पुत्र धवलसिंह मोहिते-पाटील यांच्या नेतृत्वाखाली जिल्ह्यात कॉंग्रेस मजबूत होईल, असेही रूपनवर म्हणाले.