मंगळवेढा - राज्यातील कोरोनामुळे अनाथ बालकांची (Orphan Child) संख्या वाढल्यामुळे त्यांच्यासाठी 18 च्या पुढील वयोगटासाठी असलेल्या मुलासाठी अनुरक्षण गृहाची संख्या वाढवण्याबाबतचा शासनाचा (Government) विचार असल्याचे महिला व बालकल्याण मंत्री यशोमती ठाकूर (Yashomati Thakur) यांनी सांगितले. याबाबतचा प्रश्न आ. समाधान आवताडे (MLA Samadhan Avtade) यांनी उपस्थित केला होता.

विधानसभेच्या अर्थसंकल्पीय अधिवेशनामध्ये आज सकाळच्या प्रश्नोत्तरे सत्रामध्ये आ.आवताडे यांनी कोरोनाच्या भीषण परिस्थिती मुळे अनाथ बालकांची संख्या वाढली असून, 18 वर्षापर्यंत संगोपन शासनाकडून केले जाते. अठरा वर्षांनंतर देखील काहीना नोकरीच्या संधी किंवा त्यांना त्यांच्या पायावर उभे राहण्यासाठी अडचणी येत राहतात. त्यामुळे त्या मुलाची जबाबदारी शासन घेणार आहे का? या अनुषंगाने हा प्रश्न उपस्थित केला होता.

त्यास उत्तर देताना महिला बालकल्याण मंत्री यशोमती ठाकूर म्हणाल्या की, सध्या 18 वर्षापर्यंतच्या मुलाची काळजी घेतली जाते. त्याची त्यासाठी अनुरक्षण गृहांची संख्या देखील वाढवणार असल्याचे सांगून अनुरक्षण गृहाच्या माध्यमातून 18 ते 21 व 21ते 24 वयोगटातील मुला-मुलींना बालगृहात ठेवण्याचा निर्णय घेतला. असा निर्णय घेणारे महाराष्ट्र हे देशातील पहिले राज्य ठरले आहे. या बालगृहातील मुलांना कौशल्य विकासाचे प्रशिक्षण देऊन त्यांना त्यांच्या पायावर उभा करण्याच्या दृष्टीने शासनाचे प्रयत्न असल्याचे महिला बाल कल्याण मंत्री ठाकूर आ. आवताडे यांच्या प्रश्नाला उत्तर देताना म्हणाल्या.