सोलापूर : सोलापूर ते गोवा विमानसेवा सुरू झाल्यानंतर ऑगस्टमध्ये सोलापूर ते मुंबई विमानसेवा सुरू करण्यासाठी आमचे प्रयत्न सुरू आहेत. ऑगस्टमध्ये मुंबईची विमानसेवा सुरू होईल, असे आम्ही जाहीर केले होते. आता ऑगस्ट सुरू झाला आहे, आणखी एक महिना शिल्लक आहे. ऑगस्टमध्ये सोलापूर ते मुंबई विमानसेवा सुरू होईल, असा विश्‍वास पालकमंत्री जयकुमार गोरे यांनी सोलापुरात व्यक्त केला.

पालकमंत्री गोरे शुक्रवारी (ता. १) सायंकाळी सोलापूरच्या दौऱ्यावर आले होते. रेल्वे स्थानकावरील कार्यक्रम आटोपल्यानंतर पालकमंत्री गोरे सातरस्ता येथील शासकीय विश्रामगृहात आले होते. जवळपास एक ते दिड तास ते या ठिकाणी होते. यावेळी त्यांनी ही माहिती पत्रकारांना दिली. यावेळी आमदार सचिन कल्याणशेट्टी, आमदार देवेंद्र कोठे, सोलापूर बाजार समितीचे सभापती दिलीप माने, भाजप जिल्हाध्यक्ष शशीकांत चव्हाण आदी उपस्थित होते.

सोलापूर जिल्ह्यातील काही प्रमुख नेत्यांचे भाजपात प्रवेश होणार आहेत का?, या संदर्भात पालकमंत्री गोरे यांना विचारले असता, त्यांनी स्मित हास्य केले. आगे आगे देखो होता है क्या...असे सूचक वक्तव्य त्यांनी केले. सर्वोच्च न्यायालयाच्या आदेशानंतर जिल्हा परिषद, महापालिका, नगरपरिषदांच्या निवडणुकीसाठी जिल्हा प्रशासन तयारीला लागले आहे. पावसाळ्यानंतर ऑक्टोबरपासून स्थानिक स्वराज्य संस्थांच्या निवडणुकांना सुरुवात होईल, असा अंदाज आहे. या निवडणुकांपूर्वी जिल्ह्यात पक्षांतराचा मोठा धमाका भाजप करण्याची शक्यता आहे.

भेटीसाठी दिग्गजांची हजेरी

पालकमंत्री गोरे, आमदार सचिन कल्याणशेट्टी, आमदार देवेंद्र कोठे शासकीय विश्रामगृहात असल्याने त्यांच्या भेटीसाठी सोलापूर शहरातील अनेक दिग्गज नेत्यांनी हजेरी लावल्याचे दिसले. भाजपचे माजी नगरसेवक सुरेश पाटील, राष्ट्रवादीचे माजी उपमहापौर नाना काळे, राष्ट्रवादीचे नेते आनंद चंदनशिवे यांनी या ठिकाणी हजेरी लावली. मतदारसंघातील कामानिमित्त पालकमंत्री गोरे यांना भेटण्यासाठी आलो असल्याचे या नेत्यांनी यावेळी सांगितले.