सोलापूर : कोरोनामुळे तब्बल अडीच वर्षे जागेवर थांबलेल्या कलबुर्गी- कोल्हापूर एक्स्प्रेसला रेल्वे बोर्डाकडून हिरवा कंदील मिळाला आहे. त्यानुसार सोलापूर विभागाकडून तयारी सुरू झाली असून, लवकरच गाडी सुरू होणार असल्याची माहिती रेल्वेच्या विश्वसनीय सूत्रांनी ‘सकाळ’शी बोलताना दिली.

सूत्रांकडून मिळालेल्या माहितीनुसार, कलबुर्गी- कोल्हापूर एक्स्प्रेस सुरू होत असल्याने व दररोज धावणार असल्याने मिरज, कोल्हापूरकडे दररोज ये-जा करणाऱ्या प्रवाशांची सोय होणार आहे. दुसरीकडे, सोलापूर विभागाने देखील रेक तयार करण्याच्या दृष्टीने काम सुरू केले आहे. गाडी सुरू होणार असल्याने सोलापूरसह विविध भागांतून गाणगापूर, अक्कलकोट, पंढरपूर या तीर्थस्थळी जाणाऱ्या भाविकांना दिलासा मिळाला आहे. त्याचबरोबर मिरज, कोल्हापूरला जाणाऱ्या महाविद्यालयीन विद्यार्थी, व्यापारी, शेतकरी, चाकरमान्यांना कलबुर्गी- कोल्हापूर एक्स्प्रेस सुरू होत असल्याने दिलासा मिळणार आहे. गाडीस एकूण १३ डबे असणार आहेत.

‘या’ स्थानकांवर थांबे

कलबुर्गी-कोल्हापूर एक्स्प्रेसला गाणगापूर, अक्कलकोट, सोलापूर, कुर्डुवाडी, पंढरपूर, मिरज आणि कोल्हापूर या ठिकाणी थांबे असणार आहेत. ही गाडी कलबुर्गी स्थानकावरून सकाळी ६.४० मिनिटांनी निघेल तर सोलापूरला सकाळी ८.३० वाजता येईल तर कोल्हापूरला दुपारी २.१५ वाजता पोचणार आहे. दुपारी तीन वाजता कोल्हापूर येथून निघेल व सोलापूरला रात्री ९.०८ वाजता येईल. कलबुर्गीला रात्री १०.४५ वाजता पोचणार आहे.

ठळक बाबी...

- १३ डब्यांचा असणार रेक

- एक वातानुकूलित चेअर कार तर १० जनरल डबे

- गाणगापूर, अक्कलकोट, पंढरपूरला जाणाऱ्या भाविकांची झाली सोय

- खासगी व एसटी बसच्या तुलनेत रेल्वे प्रवास स्वस्त

- प्रवाशांचे पैसे व वेळेची होणार बचत