करमाळा - मराठा समाजाच्या आरक्षणाच्या मागणीसाठी करमाळा तहसील कार्यालयासमोरी बॅनरवरील मुख्यमंत्री एकनाथ शिंदे उपमुख्यमंत्री देवेंद्र फडवणीस उपमुख्यमंत्री अजित पवार आरोग्य मंत्री तानाजी सावंत यांच्या फोटोला मराठा समाजाच्या कार्यकर्त्यांनी काळे फसले आहे.

मराठा समाजाला ओबीसी मधून आरक्षण मिळावे या मागणीसाठी मनोज जरंगे-पाटील यांनी सुरू केलेल्या आंदोलनाला पाठिंबा देण्यासाठी करमाळा तहसील कार्यालयासमोर मराठा समाजाच्या आरक्षणासाठी चक्रीय उपोषण सुरू असून आज चक्रीय उपोषणाचा पाचवा दिवस आहे.

या उपोषणासाठी मोठ्या संख्येने कार्यकर्ते उपस्थित राहत आहेत. सोमवार ता. 30 ऑक्टोबर रोजी करमाळा तहसील कार्यालयासमोर शासनाच्या वतीने लावण्यात आलेल्या उत्सव नवराञीचा.... महाराष्ट्राच्या आरोग्याचा मोफत महाआरोग्य शिबीर हा बॅनर लावला आहे. तुळजापूर, जि. धाराशिव येथे आरोग्य मंत्री तानाजी सावंत यांच्या पुढाकाराने हे आरोग्य शिबिर घेण्यात आले होते. या शिबिराचा हा बॅनर आहे.

करमाळा तहसील कार्यालयाच्या प्रवेशद्वार शेजारीच शासनाच्या विविध योजनांची माहिती देण्यासाठी बॅनर लावण्याची व्यवस्था करण्यात आली आहे. या ठिकाणी नेहमी शासनाच्या विविध योजनांचे माहिती देणारे बॅनर लावलेले असतात नवरात्र उत्सवानिमित्त आरोग्य खात्याच्या वतीने राबविण्यात येणाऱ्या महाआरोग्य शिबिराच्या जाहिरातीचा हा बॅनर लावण्यात आला आहे.

या बॅनरवरती मुख्यमंत्री एकनाथ शिंदे उपमुख्यमंत्री देवेंद्र फडवणीस उपमुख्यमंत्री अजित पवार व आरोग्य मंत्री तानाजी सावंत यांचे फोटो आहेत याच फोटोला कार्यकर्त्यांनी काळे फासले आहे.

आरोग्य शिबिर या बॅनरवरील मुख्यमंत्री एकनाथ शिंदे, उपमुख्यमंत्री देवेंद्र फडवणीस, उपमुख्यमंत्री अजित पवार व आरोग्य मंत्री तानाजी सावंत यांच्या फोटोला कार्यकर्त्यांनी काळे फासुन मराठा समाजाचा रोष व्यक्त केला आहे.

जोपर्यंत मराठा समाजाला आरक्षण मिळत नाही तोपर्यंत पुढाऱ्यांना गावबंदी करण्याचे ठरावही करमाळा तालुक्यातील 40 पेक्षा जास्त गावांनी केले आहेत.

दोन दिवसापूर्वी करमाळा बस स्थानकातील एसटी बसेस वरील पंतप्रधान नरेंद्र मोदी, मुख्यमंत्री एकनाथ शिंदे व इतर नेतेमंडळींच्या फोटोला एक मराठा लाख मराठा.... मराठा समाजाला आरक्षण मिळालेच पाहिजे... कोण म्हणतो देत नाही घेतल्याशिवाय राहत नाही अशा घोषणा देत काळे फसण्यात आले होते.

त्यानंतर आज सोमवार ता. 30 रोजी करमाळा तहसील कार्यालयाच्या समोर लावण्यात आलेल्या महाराष्ट्र शासनाच्या बॅनरवरील फोटोला काळे फासले आहे.

मराठा समाजाच्या जीवावर राजकीय सत्ता भोगणाऱ्या मराठा समाजातील नेते मंडळी विषयी समाजातून रोज व्यक्त होत असून वेळीच मराठा समाजाच्या आरक्षणाबाबत सकारात्मक भूमिका घेण्याची मागणी मराठा समाजातून होत आहे. करमाळा येथे सुरू असलेल्या चक्रीय उपोषणाला रविवार ता. 29 रोजी महिलांनी मोठी उपस्थिती दर्शवत घोषणाबाजी केली. तर दुसरीकडे साडे (ता. करमाळा) येथे केंद्रीयमंञी नारायण राणे माढ्याचे आमदार बबनराव शिंदे, गुणरत्न सदावर्ते यांच्या पोस्टरला जोडेमार अंदोलन करण्यात आले. तसेच प्रतिकात्मक पुतळे जाळण्यात आले.

करमाळा तालुक्यातील गावोगावी मराठा समाजाचे कार्यकर्ते आक्रमक होताना दिसुन येत आहेत.