वडाळा(सोलापूर)ः एसटीची मालवाहतूक सेवा आता खऱ्या अर्थाने शेतकऱ्यांसाठी उपयोगी ठरू लागली आहे. शेतकऱ्यांना ही सेवा उपलब्ध व्हावी व त्यांचा माल बाजारात जाण्याच्या दृष्टीने मोठा प्रयत्न एसटीने केला आहे. परवडणारे दर व चांगली सेवा या गोष्टी राखत एसटीने शेतीमालाची वाहतूक सूरू केली आहे. नान्नज येथील शेतकरी संदेश जाधव यांच्या नर्सरीतून द्राक्षाची रोपे नेण्यासाठी एसटी गाडी चक्क त्यांच्या शेताच्या बांधावर पोहोचली. या सेवेमुळे शेतकरी देखील चकित झाले. 

हेही वाचाः धक्कादायकः कोविड सेंटर उभारणीला विरोध करण्यासाठी या गावातील ग्रामस्थ उतरले रस्त्यावरः वाचा सविस्तर 

कोरोना मुळे सर्वत्र अनेक निर्बंध आहेत. यामुळे शेतकऱ्यांनाही याचा फटका बसत आहे. भाजीपाला वाहतुक अथवा इतर कृषी संबंधित वाहतुक असो यामध्ये शेतकरी भरडला जात आहे. मात्र उत्तर सोलापूर तालुक्‍यात अगोदर द्राक्ष्यांसाठी प्रसिद्ध असणाऱ्या नान्नज आता द्राक्षे नर्सरी (हुंड्या) तयार करण्यासाठी प्रसिद्ध झाले आहे. येथील रोपे महाराष्ट्रभर विकली जातात. 

हेही वाचाः किराणा, फळे, औषधीसाठी तुडूंब गर्दी 

सध्या लॉकडाउनमुळे खासगी वाहतूकदार ही वाहतुकीस धजेनात. यामुळे बीड पाटोदा येथील शेतकरी भारत गरझे यांनी कलमी द्राक्षे रोप नान्नज मध्ये खरेदी केली आणि वाहतुकीसाठी एस.टी. महामंडाळाची एसटी बार्शी डेपो मधून बुक केली. तेव्हा रोपे नेण्यासाठी लालपरी चक्क शेतकऱ्यांच्या बांधावर आली. एरव्ही रस्त्यावर धावताना पाहणारांना याचे कुतुहुल वाटले. नान्नज मधील युवा शेतकरी संदेश जाधव यांनी त्यांच्या नर्सरीमधील द्राक्षांची तीन हजार रोपे लालपरीतून रवाना केले. 

शेतमालाचे नुकसान एसटीमुळे टळेल 
"अशा एस. टी. सेवेचा लाभ अनेक शेतकऱ्यांनी घेणे गरजेचे आहे. सध्या भाजीपाला व शेतमाल बाजारपेठेत नेण्यास अडचणी आहेत. त्यामुळे एसटीची सेवा उपयोगी आहे. 
- संदेश जाधव, नान्नज, ता.उत्तर सोलापूर द्राक्षे नर्सरी धारक  

संपादनः प्रकाश सनपूरकर