मंगळवेढा : शहर व ग्रामीण भागात यंदाच्या नवरात्र महोत्सवात नवरात्र मंडळांनी उभारलेल्या प्रबोधनाच्या,ऐतिहासिक, धार्मिक देखावे पाहण्यासाठी शहरात गर्दी वाढल्याने शहराला जत्रेचे स्वरूप आले.

नवरात्र महोत्सवात शहर 22 मंडळासह ग्रामीण भागातील एकूण 82 मंडळाकडून देवीच्या मूर्तीची स्थापना केली. या मंडळाकडून शहरात उभा केलेले देखावे विद्युत रोषणाई व इतर प्रबोधनाचे कार्यक्रम हे पाहण्यासारखे असल्याने देखावे व विद्युत रोषणाई रात्री उशिरापर्यंत सुरू असते.

मंगळवेढ्यासह शेजारच्या तालुक्यातील स्त्री व पुरुष मोठ्या प्रमाणात हे देखावे पाहण्यासाठी गर्दी करत आहेत.या दरम्यान हॉटेल, पान दुकान ,किराणा दुकान, कापड दुकान यांची मोठे आर्थिक उलाढाल होत आहे.

शहरात फराळाचे साहित्य,खेळणी, फळे,साड्या,बनियन,याच्या माध्यमातून मोठी आर्थिक उलाढाल होत आहे. सध्या तालुक्यातील ग्रामपंचायतीची निवडणूक असल्यामुळे अनेकांनी बनियन व टी-शर्ट च्या रूपाने मदत झाली तर तालुक्यातील काही राजकीय नेत्याच्या नावाने देखील या मदतीत हातभार लागला.

सराफ गल्ली येथील नव महाराष्ट्र मंडळाने यंदा केदारनाथ मंदिराचा तर मारुती पटांगणातील जय भवानी मंडळाने देखील दर्शनीय देखावा उभा केला. इथल्या देवीच्या दर्शनासाठी मुख्य मंदिरापासून ते चोखामेळा चौकापर्यंत भाविकांची रांग लागली.

माने गल्ली येथे नऊ महाराष्ट्र तरुण मंडळाने अंधश्रद्धा निर्मूलनाचा देखावा उभा केला. आहे तर काही ठिकाणी कारंजे लेजर सो दाखवले जात आहे, शनिवार पेठ,सनगर गल्ली,माने गल्ली,होनमाने गल्ली,माळी गल्ली, हे देखावे पाहण्यासाठी घरातून रात्री महिला व पुरुष मोठ्या प्रमाणात बाहेर पडले आहेत. त्यामुळे शहरांमध्ये नुसते भाविकांच्या गर्दीने फुलून गेले.

यंदाच्या नवरात्र महोत्सवासाठी शहरात आलेल्या भाविकांची गर्दी लक्षात घेता 40 पुरुष व 15 महिला होमगार्डचा अतिरिक्त बंदोबस्त लावला असून महिलांनी दर्शनाला येताना आपापले दागिने सुरक्षित ठेवावेत.

- रणजीत माने पोलीस निरीक्षक मंगळवेढा