करकंब (सोलापूर) : जळोली (ता. पंढरपूर) येथे आज (बुधवार) पहाटे शिवाजी शेंबडे यांच्या शेतातील घरासमोर बांधलेल्या शेळीवर बिबट्यासदृश प्राण्याने हल्ला करून पळ काढला. सकाळी उठल्यावर पावलांच्या ठशाचा माग काढला असता ती शेळी जवळील उसाच्या शेतात मृतावस्थेत आढळून आली. 

पंढरपूर तालुक्‍याच्या सीमेलगत वावर 
मे महिन्याच्या पहिल्या आठवड्यात कान्हापुरी येथे बिबट्या दिसल्याच्या चर्चा होत्या. शिवाय पंढरपूर तालुक्‍याच्या सीमेलगत असणाऱ्या बेंबळे (ता. माढा) येथेही बिबट्याचा वावर असल्याच्या बातम्या येत होत्या. आता याच परिसरातील जळोली येथील शेळीवर हल्ला झाल्याने बिबट्यासदृश प्राण्याचा वावर असल्याच्या चर्चेला दुजोरा मिळाला आहे. 

हेही वाचा : शेतकऱ्याचा फायद्याची बाजार समिती की ई-नाम?

कालव्यामुळे उसाचा ग्रीनपट्टा 
करकंबच्या पश्‍चिम भागातून गेलेल्या उजनीच्या डाव्या कालव्यामुळे करोळे, कान्हापुरी, जळोली, उंबरे, पेहे, नेमतवाडी, सांगवी हा संपूर्ण भाग उसाचा ग्रीनपट्टा म्हणून ओळखला जातो. शिवाय याला जोडून असणाऱ्या माढा तालुक्‍यातील काही गावांतही ऊसशेती मोठ्या प्रमाणात आहे. यामुळे बिबट्याचे वास्तव्य असू शकते, असा अंदाज प्राणीतज्ज्ञांमधून व्यक्त केला जात आहे. नुकतीच तुंगत (ता. पंढरपूर) येथील शेतकऱ्यावर बिबट्याने हल्ला करून नाकाचा लचका तोडल्याची घटना ताजी असतानाच आता जळोली येथील शेळीवरील हल्ला केल्याने ऊस पट्ट्यातील शेतकऱ्यांतून चिंता व्यक्त केली जात आहे. 

हेही वाचा : उजनी धरणातून सोलापूर शहराला पिण्यासाठी सोडले पाणी

पायाच्या ठशांचे फोटो घेतले 
आज वनसेवक दिलखूश मुलाणी आणि जावेद मुलाणी यांनी जळोली येथे जाऊन शेळीवर हल्ला केलेल्या प्राण्याच्या पायाच्या ठशांचे फोटो घेतले आहेत. मृत शेळीला उसातून बाहेर काढून पंचनामा करून वरिष्ठांना अहवाल पाठविला आहे.