वाटंबरे (सोलापूर) : चिनके (ता. सांगोला) येथे सोनारसिद्ध मंदिरजवळ सोनारसिद्ध ओढ्यावरील पुलाजवळ कॅनलमध्ये पाणी जास्त झाल्याने नीरा फाटा क्रमांक पाच फुटला. दोन शेतकऱ्यांच्या विहिरीत गाळ गेल्याने 10 लाख रुपयांचे नुकसान झाले आहे. 

पाणी भरपूर प्रमाणात फुगले 
आज सायंकाळी चार वाजता शिवकालीन बंधाऱ्याजवळील 13 नंबर वितरिका उघडलेली होती; परंतु शिवकालीन बंधाऱ्याजवळील वितरिका न उघडल्याने कॅनलमधील माण नदीकडे जाणाऱ्या पाण्याला जीसीबीने बांध घातल्याने पाणी भरपूर प्रमाणात फुगले आणि पाणी जास्त झाल्याने सोनारसिद्ध मंदिरच्या ओढ्यावरचा फाटा क्रमांक पाच फुटून पाणी मोठ्या प्रमाणात वाया गेले. 

हेही वाचा : आषाढी एकादशीला पूजेसाठी येणार मुख्यमंत्री 

शेतकऱ्यांच्या विहिरीत पाणी 
या पाण्यामुळे देवानंद सुखदेव मिसाळ व महादेव प्रल्हाद मिसाळ या शेतकऱ्यांच्या विहिरीत पाणी जाऊन विहिरी पूर्णपणे बुजल्या आहेत. त्यांचे 10लाख रुपयांचे नुकसान झाले आहे. पाणी फुटल्याने सोनारसिद्ध ओढ्याजवळील अनेक शेतकऱ्यांचे बांध वाहून गेले. या पाण्यामुळे शेतकऱ्यांच्या डोळ्यांत पाणी आले आहे. 

हेही वाचा : पक्ष्यांचे देखणेपण त्या मुलांनी टिपले कॅमेऱ्यात

विहीर पूर्णपणे बुजली 
आज चार वाजता नीरा फाटा क्रमांक पाच फुटल्याने माझ्या विहिरीतील गाळ काढण्याचे काम चालू होते. 15 दिवस झाले मी विहिरीचा गाळ काढत होतो. कॅनॉलचे पाणी विहिरीत आल्याने माझी विहीर पूर्णपणे बुजली आहे. माझे पाच लाख रुपयांचे नुकसान झाले. 
- देवानंद मिसाळ, 
चिनके, शेतकरी 

नुकसान भरपाई मिळावी 
नीरा फाटा क्रमांक पाच फुटल्याने माझ्या विहिरीत कॅनलचे पाणी येऊन माझी विहीर पूर्णपुणे बुजली आहे. आता पिकांना पाणी कसे देऊ हेच मला कळत नाही. माझे पाच लाख रुपयांचे नुकसान झाले. तरी नुकसान भरपाई मिळावी. 
- महादेव मिसाळ, 
चिनके, शेतकरी