मंगळवेढा (जि. सोलापूर) : एकमेकांवरील तक्रार अर्जावर कारवाई व्हावी, या मागणीसाठी नगरपालिकेच्या प्रवेशद्वारावर नगराध्यक्ष, नगरसेवक आणि कर्मचारी यांच्यात आंदोलन सुरू असतानाच आता त्यात चौथ्या आंदोलनाची भर पडली असून शहरातील अतिक्रमण काढण्याच्या मागणीसाठी राजे प्रतिष्ठानने निदर्शने व धरणे आंदोलन सुरू केले. यामुळे पालिकेत आलेल्या नागरिकांना मात्र अडचणींचा सामना करावा लागला. 

हेही वाचा - उस्मानाबाद जिल्ह्यातील शेतकऱ्यांचे पंढरपुरात उपोषण 

प्रजासत्ताक दिनापासून नगरपालिकेच्या प्रवेशद्वारावर नगराध्यक्षा, 13 नगरसेवक आणि कर्मचारी यांची आंदोलने सुरू आहेत. त्यातच सर्वोच्च न्यायालयाचा आदेश असताना नगरपालिकेने शहरातील अतिक्रमण न काढता ती अतिक्रमणे कागदोपत्री काढल्याचे दाखविल्यावरून राजे प्रतिष्ठान या संघटनेने निदर्शने व धरणे आंदोलन सुरू केले आहे. यापूर्वी मुख्याधिकारी पल्लवी पाटील या आपल्याला विश्‍वासात न घेता चुकीच्या पद्धतीने कामकाज करत असल्याच्या आरोपावरून त्यांना निलंबित करून कारवाई करावी, या मागणीसाठी नगराध्यक्षा अरुणा माळी नगरपालिकेच्या उजव्या बाजूला आंदोलनासाठी बसल्या आहेत. तर नगराध्यक्षा चुकीच्या मनमानी पद्धतीने कारभार करतात, त्यांच्या पतीच्या वाढत्या हस्तक्षेपावर व ठेकेदाराच्या बिलावर सही करत नसल्याच्या वादावरून अन्य प्रश्‍नांसंदर्भात कारवाई करावी, या मागणीसाठी 13 नगरसेवकांनी नगरपालिकेच्या डाव्या बाजूला आंदोलन सुरू केले. तर या आंदोलनात भरीस भर म्हणून नगरपालिकेच्या कार्यालयीन कर्मचाऱ्यांनी देखील अन्याय व त्रासातून मोकळे करावे, यासाठी थेट मुख्य दरवाजात आंदोलन सुरू केले. 

हेही वाचा - सोलापूर जिल्ह्यात माजी सैनिकाचा खून 

गेल्या दोन दिवसांतील शासकीय सुटीमुळे आज आठवडा बाजार दिवशी नगरपालिकेत विविध दाखले व इतर कामांसाठी शहर व ग्रामीण भागातून आलेल्या नागरिकांना या आंदोलनांमुळे रिकाम्या हाताने परतावे लागले. सध्या कुरघोडीच्या राजकारणाने शहरातील नागरिकांना अनेक समस्यांना सामोरे जावे लागत असताना प्रजासत्ताक दिनी लोकप्रतिनिधी आणि कर्मचाऱ्यांनी आंदोलनात सहभागी होऊन सर्वसामान्य शहरवासीयांना मात्र वाऱ्यावर सोडल्याची चर्चा शहरात सुरू झाली.