सोलापूर : केंद्र सरकारच्या मेट्रो ट्रेन योजनेत सहभाग घेण्यासाठी संबंधित शहराची तथा महापालिकेची लोकसंख्या 10 लाखांहून अधिक असावी लागते. 2011 च्या जनगणनेनुसार सोलापूर शहराची लोकसंख्या साडेनऊ लाखांपर्यंत होती, आता त्यात मोठी वाढ झाली आहे. फेब्रुवारी 2021 मध्ये जनगणना पूर्ण होणार आहे. सोलापूर महापालिका मेट्रोचा आराखडा तयार करून केंद्र सरकारला प्रस्ताव पाठविणार आहे. त्यादृष्टीने नियोजनाला सुरवात झाली आहे. 

हेही नक्‍की वाचा : भाजप खासदारांसमोरील अडचणीत वाढ ! सोलापूर न्यायालयात तहसिलदारांची फिर्याद 

शहरातील लोकसंख्येने 10 लाखांचा टप्पा पार केल्यानंतर त्या शहराने "मेट्रो'चे प्लॅनिंग करायला सुरवात करावी. लोकसंख्या 20 लाखांवर जाताच संबंधित शहराने "मेट्रो'च्या कामाची सुरवात करावी, असा नियम आहे. मागील 10 वर्षांच्या तुलनेत सोलापूर शहराचा विस्तार अन्‌ लोकसंख्या वाढली आहे. 2021 च्या जनगणेनुसार त्यावर शिक्‍कामोर्तब होणार असून मेट्रो सुरू करण्यास महापालिका इच्छुक असल्याचे नगरअभियंता संदीप कारंजे यांनी स्पष्ट केले. शहरातील वाढलेली वाहने आणि जागोजागी होणारी वाहतूक कोंडी, वाहनांमुळे वाढलेले हवा व ध्वनी प्रदूषण कमी करण्याच्या दृष्टीने मेट्रोची गरज आहे. केंद्र सरकारने तशी योजना तयार केली असून त्यामध्ये पुण्यासह अन्य मोठ्या शहरांनी सहभाग नोंदवला आहे. पुण्यात मेट्रो सुरू करण्यासाठी केंद्र व राज्य सरकारने निधी दिला असून पुणे महापालिकेनेही कर्जरूपात निधी जमा केला. पुण्यातील मेट्रोसाठी 11 हजार 420 कोटींचा खर्च आला आहे. त्यातून पुण्यातील वाहतूक समस्या सुटेल, असा विश्‍वास पुणे मेट्रोचे संचालक अतुल गाडगीळ यांनी सोलापुरातील एका कार्यक्रमात व्यक्‍त केला. त्यांनी सोलापूर महापालिकेला मेट्रोची तयारी करण्याचे आवाहनही केले. 

हेही नक्‍की वाचा : कर्नाटक सरकारच्या धर्तीवर महाराष्ट्रातील शेतकऱ्यांना व्याजमाफी ? 

"मेट्रो'मुळे होते सर्वकाही शक्‍य... 

• मेट्रोमुळे शहरातील वाहतूक कोंडीवर हमखास निघतो तोडगा 
• शहरातील उद्योग, अर्थकारण सुधारण्यास मिळतो वाव 
• विनाअडथळा सार्वजनिक वाहतूक व्यवस्था राहते सुरळीत 
• अपघात कमी होतात, जड वाहतुकीचा अडथळा होतो दूर 
• हवा प्रदूषणावर नियंत्रण होणे शक्‍य : पर्यटन वाढीस मिळतो वाव