कुर्डुवाडी (सोलापूर) : ऐन हिवाळ्यात (Winter) पडणाऱ्या पावसामुळे (Rains) नागरिकांना नेमका कोणता ऋतू सुरू, आहे हेच समजेनासे झाले आहे. 'पावसाळा नाही आणि हिवाळा पण नाही.. हा तर हिवसाळा...' या प्रकारचे मिम्स सोशल मीडियावर (Social Media) व्हायरल होत आहेत.

गेल्या काही वर्षांपासून वातावरणात मोठे बदल होत आहेत. अवेळी पडत असलेल्या या पावसामुळे शेतकऱ्यांचे खूप नुकसान होत आहे. पावसामुळे (Rainy Season) नागरिक कामाव्यतिरिक्त बाहेर पडत नाहीत. छोटे व्यावसायिक ग्राहकांची वाट पाहात असल्याचे चित्र आहे. सर्वसामान्य नागरिक या अवेळीच्या पावसाला कंटाळले आहेत. दिवाळीत व नंतर साधारणपणे थंडी असते, पण यंदा दिवाळीत रात्री अनेक वेळा फॅन लावावा लागला. सध्या तर केव्हा पाऊस पडेल हे सांगता येत नाही. केव्हाही पाऊस पडू शकतो या मानसिकतेतून नागरिक त्या तयारीनीशी घराबाहेर पडत आहेत. दिवसा किंवा संध्याकाळी पाऊस पडत असल्याने बाहेर जाणाऱ्यांना छत्री किंवा रेनकोट घेऊन जावे लागत आहे.

रात्रीच्या वेळी उकाड्याने फॅन लावावा लागतो, तर पहाटे मॉर्निंग वॉक किंवा कामानिमित्त जाणाऱ्यांना स्वेटर घालावा लागत आहे. याबद्दलचे अनेक मिम्स सोशल मीडियावर व्हायरल झाले आहेत. 'जूनमध्ये शाळा सुरू झाल्याचा मुलांना फील यावा म्हणून आता डिसेंबरमध्ये पाऊस पडतोय..!', 'सूर्य सुट्टीवर गेल्याने वरुणराजाने हजेरी लावली..!', 'आता फक्त रात्री ऊन पडायचे बाकी राहिलंय..!', 'स्वेटर घालावा की रेनकोट घालावा..? स्वेटरवर रेनकोट घाला..!' अशा प्रकारचे मिम्स सोशल मीडियावर व्हायरल झाले आहेत.