सोलापूर : महाराष्ट्रासह देशात कोरोना विषाणूंचा संसर्ग दिवसेंदिवस वाढतच चालला आहे. कोरोनाचा संसर्ग रोखण्यासाठी शासनाला मदतीचा हात देण्यासाठी करमाळ्याचे अपक्ष आमदार संजयमामा शिंदे सरसावले आहेत. आमदारकीचे एक महिन्याचे वेतन मुख्यमंत्री सहाय्यता निधीला देणार असल्याची माहिती आमदार संजयमामा शिंदे यांनी दिली. 
हेही वाचा - सोलापुरात येणाऱ्या 2574 जणांची तपासणी 
आमदार संजयमामा शिंदे म्हणाले, कोरोना विषाणूंचा संसर्ग रोखण्यासाठी केंद्र सरकार आणि राज्य सरकार युद्ध पातळीवर प्रयत्न करत आहे. हा संसर्ग रोखण्यासाठी शासनाच्यावतीने विविध प्रतिबंधात्मक उपाययोजना केल्या जात आहेत. चीन, इटली यासह परदेशात असलेला कोरोनाचा संसर्ग आता ग्रामीण भागापर्यंत पोचण्याची भीती निर्माण झाली आहे. नागरिकांनी या संकटाला घाबरू नये. कोरोनाच्या संकटाचा सामना आपण करू शकतो. वारंवार हात धुणे, मास्क वापरणे आणि गर्दीच्या ठिकाणी जाण्याचे टाळल्यास आपण कोरोनाच्या विषाणूंचा प्रसार रोखू शकतो. मला काही होत नाही अशा भ्रमात न राहता प्रत्येकाने प्रशासनाच्या आदेशाचे पालन करावे असे आवाहनही आमदार संजयमामा शिंदे यांनी केले आहे.