मोहोळ - गेल्या साधारण महिन्या पासून कमी झालेले दुधाचे दर, तर पशुखाद्य, हिरवा चारा, चुरापेंड यांचे वाढलेले दर यामुळे ग्रामीण भागातील दूध व्यवसायाला घरघर लागली आहे. दरम्यान भविष्यातील चारा, पाणी टंचाईची चाहूल लागल्याने दावणीला असलेली दुभती जनावरे शेतकरी येईल त्या किमतीला विकू लागला आहे. त्यामुळे मोठा अर्थीक तोटा सहन करावा लागत आहे.

ग्रामीण भागात शेतीला जोडधंदा म्हणून मोठ्या प्रमाणात दूध व्यवसाय केला जातो. शेतीतील उत्पन्न पीक लागवडी नंतर किमान सहा महिने तरी येत नाही, तो पर्यंत खर्चासाठी म्हणून दूध व्यवसाय फायदेशीर ठरतो. रासायनिक खताचे दर गगनाला भिडल्याने शेतकरी आता रासायनिक खता ऐवजी शेण खताकडे वळला आहे.

जर्सी दुभत्या गायीच्या माध्यमातून शेतीला मोठ्या प्रमाणात शेणखत उपलब्ध होते. ज्या शेतकऱ्याकडे घरचा चारा उपलब्ध आहे त्याला दूध व्यवसाय थोडाफार परवडतो. मात्र विकत घेऊन चारा घालणे हे परवडणारे नाही. गेल्या सुमारे महिन्या पासून दुधाचे दर लिटरला चार ते पाच रुपयांनी कमी झाले आहेत. अनेक शेतकऱ्याकडे किमान दहा ते पंधरा दुभत्या जर्सी गाई आहेत.

चांगले दूध देणाऱ्या गाईची किंमत 90 हजारापासून सव्वा लाखा पर्यंत आहे. मात्र भविष्यातील धोका ओळखून 90 हजाराची गाय 50 ते 60 हजाराला शेतकरी विकू लागला आहे. त्यामुळे मोठा आर्थिक तोटा सहन करावा लागत आहे. चाऱ्यासाठी म्हणून मका लागवड मोठ्या प्रमाणात केली जाते. सध्या साखर कारखाने सुरू आहेत.

त्यामुळे उसाचे हिरवे वाढे उपलब्ध आहे. मात्र कारखाने बंद झाल्यानंतर चाऱ्याची मोठी अडचण होणार आहे. एकूण परिस्थिती पाहिली असता या सर्व अडचणीमुळे दूध व्यवसायाला घरघर लागली आहे.