सोलापूर ः कोरोनामुळे जिल्ह्यातील सलून व्यवसाय बंद करण्यात आला आहे. त्यामुळे नाभिक ाबंधवांची उपासमार होत आहे. ती टाळण्यासाठी सलून व्यवसाय सुरु करावा यासाठी आज महाराष्ट्र नाभिक महामंडळाच्या कार्यकर्त्यांनी जिल्हाधिकारी कार्यालयासमोर आंदोलन केले. त्याचबरोबर त्यांच्या मागणीचे निवेदनही जिल्हाधिकाऱ्यांना देण्यात आले. 

कोरोनामुळे शहर-जिल्ह्यातील सलून व्यवसाय बंद करण्यात आला आहे. जिल्ह्याच्या ग्रामीण भागात काही दिवसांपूर्वी परवानगी दिली होती. मात्र, ती पुन्हा रद्द करण्यात आली. सलून व्यवसाय बंद असल्याने कुटुंबियांची उपासमार होत आहे. त्यामुळे शासनाकडून 10 हजार रुपये आर्थिक मदत देण्याची मागणीही संघटनेच्यावतीने यापूर्वीच सरकारकडे केली आहे. पण, अद्यापही त्याबाबत विचार झालेला नाही. कोरोनामुळे मागील जवळपास दीड महिन्यांपासून शहर-जिल्ह्यातील सलून दुकाने बंद आहेत. राज्यातील लॉकडाऊन हळूहळू शिथिल केले जात आहे. पण, सलून दुकानाबाबत सरकार सकारात्मक निर्णय घेत नसल्याची खंतही संघटनेच्यावतीने व्यक्त करण्यात आली. भविष्यातील बेरोजगारी टाळण्यासाठी लवकरच सलून दुकाने सुरु करण्यास परवानगी देण्याची मागणीही त्यांनी केली आहे. अजूनही जर हा व्यवसाय सुरु करण्यास परवानगी न दिल्यास राजाध्यक्ष कल्याण दळे यांच्या अध्यक्षतेखाली आंदोलन आणखी तीव्र करण्यात येणार असल्याचे संघटनेच्यावतीने सांगण्यात आले. यावेळी वैभव शेटे, मनोज डिगे, गणेश वाघमारे, स्वप्नील रणदिवे, आनंद वाघमारे, श्रीकांत राऊत, दिनेश विभूते, सिलीसिद्ध राऊत, राजशेखर वाघमारे, प्रशांत हडपद, नरहरी रायचूरकर, मनीष गंजाळकर उपस्थित होते.